Php50-M danyos sa infra sa CS 3rd Engineering District

Canaman, Camarines Sur --- Mayong danyos sa mga tulay asin tinampo dara kan makusog na mga pag-uran asin duros kan super typhoon ‘‘Rolly’’ sa sakop na mga banwaan kan Camarines Sur 3rd Engineering District kan Department of Public Works and Highways (DPWH).

Kun igwa man destroso kan nakaaging calamidad iyo an mga natuklab na atop na edificio kan gobierno, napasang mga bintana asin iba pang mga infrastractura kan gobierno na nagcacantidad nin labi sa P50 milyon, sabi ni Assistant District Engr. Ricardo Ragragio.

Ini an inisyal na natipon na damaged report sa sakop na mga banwaan kan tercer distrito kan Camarines Sur matapos kan pagrapado kan super typhoon sa Bicol kan nakaaging Domingo, Noviembre 1.

An 3rd Engineering District kan DPWH kinababalihan kan mga municipalidades kan Canaman, Magarao, Bombon, Calabanga, Ocampo, Pili, Camaligan asin Ciudad nin Naga.

Nin huli kaini, mayong apektadong mga national asin municipal road kun igwa man ulang sa bulos kan trafico iyo an mga natumbang mga poste asin linya nin kuryente kan Camarines Sur II Electric Cooperative (Casureco II).

An DPWH sa tercer distrito naging katuwang kan mga barangay council asin LGUs sa pagpurutol kan mga natumbang puon nin kahoy asin road clearing operations matapos tolos kan paglamasa kan bagyo.

Sa Ciudad nin Naga, maabot sa 250 milyones peso an damaged report sa mga infrastractura kan lokal na gobierno kabali digdi an Bicol Central Station, Naga District Abattoir, Naga City People’s Mall, JMR Coliseum asin danyos sa edificio kan City Hall. (DPA)