SA AGRICULTURA: Bicol nagsapo nin P3.8-B na danyos

Pili, Camarines Sur --- Super Typhoon ‘Rolly’ nagwalat nin mahiwas na destroso sa agricultura sa Kabikolan na nagsakat sa Php3.8 bilyon mantang nagbutas na nin multi-million peso an Department of Agriculture (DA) para sa rehabilitasyon sa agricultura na enterong piglaila kan makusog na duros asin tubig baha.


Apektado an maabot sa 35,494 kabali digdi si mga paratanum nin mais, paroy, may ataman nin hayopan, fishery mantang dakula si destroso sa industriya nin abaca sa Catanduanes, alagad posibleng madagdagan naman an danyos huli kan nakaaging bagyong Ulysses.

Nag-abot man sa 64,445 na hektarya an piglaila kan danyos sa mga provincia kan Camarines Norte, Camarines Sur, Albay, Sorsogon, Catanduanes afuera sa rice plantation sa Masbate alagad apektado si mga corn plantation asin high value crops.

Ini an mga pahayag ni Emily Bordado, opisyal na parataram kan DA mantang nagbisita na sa Albay asin Catanduanes si Secretaryo William sagcod na nagdarang ayuda sa mga apektado kan calamidad alagad pigpadagos an ‘Hatid Tulong’ sa ibang provincia kan Bicol kan saiyang undersecretary.

Sa rehabiliyasyon kan apektadong paraoma, sinabi pa kan DA nagtao nang mga makinarya sa pag-oma an saindang ahencia kabali na digdi an hybrid seeds, vegetable seeds, banhi sa mais, abuno asin iba pang mga tabang na nag-aabot sa P888 milyon.

Sa coconut plantations igwang danyos na Php569.8-M, abaca na may total area 39,789 hektarya nadestroso na naghahalagang Php1 bilyon, sa paroyan kabali digdi an Albay, Camarines Norte, Camarines Sur, Catanduanes asin Sorsogon. Apektado sa limang provinciang ini iyo an 18,457 mga paraoma mantang an total area 17,792 hektarya asin nagcacantidad Php1 bilyon danyos.

Sa corn plantation kabali digdi an mga provincia kan Camarines Sur, Camarines Norte, Albay, Sorsogon, asin Masbate mantang igwa man 1,196 asin envuelto an 1,009 hektarya asin nagcacantidad P26.9-M, sa fishery na-apektado man an 3,281 na mga parasira sa anom na provincia kan rehiyon.

Sa livestock an apektadong paraoma sa limang provincia dai kaayon an Masbate nasa 3,081 mientras na an cantidad Php45.9-M. (DPA)