Sara



Bakong makangalas an biglang pagdalaw sa Kabikolan ni Mayora Sara Z. Duterte kan ciudad nin Davao, kaiba pati si Senadora Imee Marcos, particularmente tanganing magtao nin ayuda sa mga biktima kan mga bagyong Quinta saka Rolly.

Susog sa bareta kan radyo naghugpa sinda sa Legazpi antes mag-helicopter pasiring Naga Airport. Kan enot palan na aldaw Miyerkoles nakapa-Albay na si Presidente Digong, an papa ni Mayora, asin naka-abot pa sa Catanduanes an pinaka-nagulpi kan bagyong si Rolly, an konsideradong pinaka-makusog na bagyo sa kinaban.

Maconsuelo ta an mga anti-Duterte sa Bikol nagpara-karantyaw na nawawara an Presidente kan nag-gayong-gayo an super typhoon, idto palan yaon man lang sa Davao an Presidente kan panahon na idto. Mala ta pakatapos kan makusugon na bagyo si Presidente Duterte nakadalagan tolos digdi sa Bikol.

An saiyang aki iyo an nagrepresentar saiya sa Camarines Sur, an pinakadakulang provincia kan Bikol. An interpretasyon tolos kan ibang taga-media asin politiko sa rehiyon iyo na talagang madalagan para Presidente kan Pilipinas si Mayora Sara sa 2022.

Kaiba pati si Senadora Marcos na pwedeng iyo an maguin kandidata para Vice Presidente. Sabagay madali nang matapos an turno ni Digong, dai na ngani maduwang taon.

Pero mayo man bawal na an aki para Presidente an ama para Vice Presidente arog kan nangyari sa Davao City na kan enot na turno ni Sara, an vice alkalde si Digong.

Duman si Mayora Sara nabisto asin nagsikat, naguin bantugan pati sa enterong Pilipinas kan binungag niya an sarong pasaway na sherif na basta nagpagaba nin mga harong sa sarong subdivision duman apesar kan order kan alkalde na maghinay-hinay kan demolisyon nin mga kaharungan kan mga kinapobrehan duman.

Iyo man idto an panahon kan 2013 na nagpa Davao City ako kaibanan ko si Elmer Abad sa sarong national convention kan Kapisanan ng mga Brodcasters sa Pilipinas(KBP).

Tulong bangui kami pig-blowout kan sakuyang high school classmates sa Ateneo na si Pete Narvaez asin ni Rockie Pornillos, an sakuyang hermano sa Sarong Banggi Organization.

An perming topic duman maguin sa laog kan harong asin mga inum-inuman bako lang an isog ni Sara kundi an liderato kan saiyang ama na dai nabubungkal sa Davao City.

Segun ki Pete Narvaez naibalik ni Digong Duterte an paz y orden sa Davao, an pinakadakulang ciudad sa kinaban sa ngaran nin kahiwasan ta sakop kaini an tuktok kan Mt. Apo, an pinakahalangkaw na bukid sa Pilipinas.

Napahali niya an NPA na dating mga hadi-hade sa Davao City, nadisiplina niya an mga paribok sa ciudad ta pag-bangui nagdadrive pa siya nin taxi.

Kun aldaw nagsasakay siya sa big bike asin naglilibot-libot sa mahiwason na ciudad.

Kuriro bako lang an mga tao kundi pati mga politiko mayong gustong magsabat saiya ta permi man lang daraog sa eleksyon.

Arog man kaiyan an gibo kan saiyang matuang aki na si Sara Duterte Carpio, maisog maski babae, disciplinarian, mayong takot maski sa mga lalaki lalo na sa mga pasaway.

Pero an hapot mangyari daw an bagay? Cierto y seguro na an pambato kan oposisyon maguin kontra ki Sara o kun siisay man an manok kan Partido Liberal asin an mga pig-aapod na Yellowtards iyo an Naguenyang si Leni Robredo, Vice Presidente ngonyan asin biyuda kadtong famusong Alkalde kan Naga na si Jessie M. Robredo.

Sa ngonyan dai pa man kita makaseguro na si Sara na talaga o si Senador Imee an katandem o si Papa Digong mismo.

Masdan ta asin abangan an susunod na kabanata. * * * Si Luigi R. Villafuerte, tugang na nguhod ni Gov. Migz iyo na an malaban asin matukaw na masunod na governador kan Cam. Sur. Sige na pati an libot, gulpi an pana-o lalo na ta naagui palang an kalamidad.

Kaiba pirme si Papa Lray asin Kuya Migz.

Dai na yan mapugulan.

Si Cong. LRay para re-eleksyon sa 2nd district, si Gov. Migz pwedeng para congressman sa 1st district o mayor kan Iriga City.

Si Ex-Cong/Gov. LRV Sr. ta nagproprograma na sa radyo pwedeng magprobar sa ikatolong beses na mabawi an pwesto para congressman kan 3rd District kaiba an Naga City sa provincia kan Camarines Sur.

Iyan an samuyang fearless forecast kan nagdadangadang na eleksyon sa 2022 sa Camarines Sur na iyo an pigbabantayan bako lang kan mga Camarinenses kundi kan mga nagmamasid sa enterong Pilipinas.

Garo maogma an masunod na eleksyon pero magastos lalo na ta an kwuarta na ibabakal sa mga botantes naghahali sa kaban kan satuyang gobyerno.