CSur naatehan na nin calamity fund
Solusyon maghogot nin fondo sa BRF
Naatehan na nin calamity fund an Capitolyo Provincial kan Camarines Sur maging an mga local government unit (LGUs) kan provincia alagad an solusyon nagpasar nin resolusyon an junta provincial sa ginibong sesyon espesyal kan Noviembre 16 nganing maghogot nin fondo sa Bicol Rehabilitation Fund (BRF) na nasa caja kan gobierno nasyonal.
‘‘Joint and collection’’ an mosyon na naghahagad sa senado na kaipuhan an fondo sa calamidad sa provincia mantang naatehan nin calamity fund an mga LGUs huli ta ginamit sa mga programa laban sa coronavirus diseases (Covid-19) asin sunod-sunod pa an mga bagyo sa Bicol na kinababalihan kan Quinta, Rolly asin Ulysses na bilyones pesos na an danyos sa agricultura, propriedad maging sa infrastractura.
Si Vokal Angel Naval, Vice Chairman kan Finance and Appropriation Committee asin floor leader sa junta provincial nagpahayag sa entrevista kan Bicol Mail an sinambit na resolusyon saindang pinasar kasunod kan kahagadan ni Senador Migs Zubiri ki Gobernador Migz Villafuerte na kaipuhan niya an back up resolution nganing i-atubang niya sa budget hearing na maninigo nang gamiton an BRF para sa rehabilitasyon sa rehiyon cinco matapos kan sunod-sunod na calamidad.
An senador nagbisita sa Camarines Sur kan Domingo, Noviembre 15 asin nakaulay sinda Gob. Migz asin 2nd District Congressman LRay Villafuerte nganing maheling an kamugtakan mga danyos kan provincia asin may darang 150 cavan nin bagas bilang tabang sa mga apektado kan calamidad.
Sinabi ni Naval na an saindang 5% na calamity fund hali sa P3-B na 2020 annual budget naubos na huli kan dakulang gastos sa Covid-19 asin sunod-sunod pa an mga calamidad.
An desisyon kan Capitolyo Provincial maghogot na nin fondo sa general fund asin disaster fund.
Ngonian na sunod-sunod an mga nakaaging calamidad na atehan na sinda nin fondo kaya kaipuhan an re-alignment nganing igwang itus-tos sa mga relief operations asin iba pang mga pangangaipo kan apektadong namamanuan kan CamSur, sabi pa ni Naval.
An re-alignment kan fondo kan LGUs base sa awtorisasyon kan Bayanihan to Heal as One Act na an gastos sa paglaban sa Covid-19 puedeng kuanon sa calamity fund. (DPAureus)