Mga utang kan ECs sa NEA hagad bayadan sa 2021

Pigtutulod kan dating Presidente kan Bicol Electric Cooperative Association (BECA) asin General Manager kan Camarines Sur I Electric Cooperative (Casureco l) sa mga GMs kan mga cooperativa nin electricidad (ECs) sa Camarines Sur nganing hagadon sa National Electrification Administration (NEA) na magkaigwa muna sinda nin moratorium kan mga utang sa ahencia envez tugoton na magbayad kan saindang obligasyon puon sa bulan nin Enero, Febrero hasta Marso 2021.

Afuera pa kaini, dapat hagadon ninda sa mga power supplier na maging utay-utay muna an saindang pagbayad sa power bill sa tahaw kan dakulang ginagastos sa mga rehabilitasyon kan mga poste asin linya kan ECs sa milyones pesos na mga destroso na winalat kan tolong magkasuronodan na bagyong ‘‘Quinta’’, ‘‘Rolly’’, asin Ulysses.

Ini an mga pahayag sa Bicol Mail ni GM Ana Sylvia Alsisto kan Casureco I alagad sa saindang manijamiento nganing dai magpatong-patong an milyones peso na obligasyon sa power bill an saindang monthly collections ibinabayad tolos.

An saindang mga babayadan para sa bulan nin Oktubre, Noviembre, asin Deciembre 2020 hahagadon ninda kan ECs na bayadan sa enot na cuarta kan taon 2021.

An planong ini nagtutubod si Alsisto na susuportaran kan presenting BECA President La Madrid asin pamayo kan junta direktiva kan Camarines Norte Electric Cooperative (Canoreco) na saro man sa apektado kan nakaaging calamidad.

Napag-araman kan BM an bagay na ini pinapaboran na kan ibang ECs mantang anas sinda apektado kan nakaaging mga calamidad.

Sa inisyal na mga damaged report kan Casureco III sa Rinconada area maabot na sa –Php84-M an saindang danyos, sa Casureco II – Php40-M asin sa Casureco I – P20-M.

An ECs, ‘none profit’ alagad kan nakaaging makusog na bagyong ‘‘Rosing’’ sa Bicol milyones peso an destroso sa mga poste asin linya asin iba pang propriedad ninda alagad sagcod sa ngunian mayo lamang nin subsidiya an gobierno nasyonal kun igwa man iyan pautang na may patong pa nin interes. (DPA)