Tigsik

Tigsik ko an Rehiyon Bikol na nanganaan na Sa mga bagyo na nangradas nin kabuhayan ta Bilyon an danyos sa infrastraktura,agrikultura Pagbangon kan mga Bikolano kayang-kaya daa

Tigsik ko, mga lugar na sagkod ngunyan baha An alipong baga iyo an sinasapo nin pangana Mga bitis magatol, rulugad na asin ta nalalapa Pirang aldaw pa, mamamarong na nin mabata

Tigsik ko ining mga internet na bagulbulon Na sagkod ngunyan mayu pa nin koneksyon Alagad kun masiringil apritado, mga listuhon Nakakaperwisyo sa mga igwa nin transaksyon

Tigsik ko man mga bungog, paslo na pulitiko Na nagbubuta-butahan sa mga pangangaipo Kan mga tawong nagbugtak sa inda sa pwesto Orog na an mga nagin biktima kan mga bagyo

Tigsik ko man an mga gurang na o guragod Gusto man kuta magpaimbong kun tig-lipot May mga babayi na habo na, pirmi pa anggot kaya si manoy minasaludo na sana man logod