An Radyo Durante kan Bagyo



Sa ika-tolong bagyo sa Kabikolan sa laog nin tolong semana, an mga taga media sa Naga garo mga ribong na suhong sa pagkalap nin mga bareta lalo na sa kamugtakan kan panahon bako lang hali sa PAGASA kundi pati ki Mike Padua aka Mr. Typhoon asin hali sa man iba-ibang makukuanan nin siring na bareta hali sa social media.

Lingaw an publiko tungkol sa Covid pandemic na iyo an aro-aldaw na bareta sa radyo, TV, diyaryo asin social media kan naka-aguing sampulong bulan alagad kan mag-abot an La Niṅa asin perming may naglalalaog na bagyo sa Philippine Area of Responsibility(PAR) na maagui sa Kabikolan, an mga parabareta sa aire perming enot na an weather forecast sa saindang bareta poon aga sagkod bangui.

Nag-agui an Quinta, nagsunod si Rolly an pigsasabing pinakamakusog na bagyong nag-agui sa enterong Pilipinas ngonyan na taon, asin ikatolo an Ulysses na kulang doros kundi makusogon si uran.

An mga anchor asin reporters sa radyo erinotan sa pagpaabot kan bareta lalong lalo na sa kusog asin direksyon kan bagyo.

Kan enot na bagyong Quinta anas pang may special coverages an mga estasyon nin radyo sa Naga asin Camarines Sur pero sa kasagsagui kan bagyo nawawara an kuryente kaya wara man an mga radyo apuera kan may sadiring generator. Kaya an mga tao minadangog sa saindang transistorised na radyo.

Pwerte pa an kompitesyon ninda pati sa relief asin rescue operations pati an pagbareta nin mga danyos sa mga harong asin mga pananom.

Sa ikaduwang bagyo na si Rolly maluya an uran pero makusugon man si doros, signal #5, daa sabi kan PAGASA, gulpi na si nadanyaran na mga pagsasaderi asin produkto agricultural.

Listo man an mga LGUs sa pagtao nin tabang sa mga biktima kan kalamidad.

Paka-agui kan makusugon na bagyong si Rolly medyo nagtamyang na an mga tao asin nag-andam para sa pag-irahay kan mga naraot na harong asin pagtanom giraray nin manlaen-laen na pananom poon paroy, gulay asin iba pa.

Alagad nagka-igwa nin bareta na igwa naman masunod na ikatolong bagyo sa Bikol na maagui duman sa inaraguihan na kan duwang naenot poon Catanduanes sagkod kahiwasan kan Camarines Sur.

An sabi kan mga gurang mayong magkasunod na bagyo sa laog nin sarong bulan alagad nangyari an bagay na tolong magkasunod anas pang makusog an doros pati uran na nagdara nin baha sa ibang parte kan Naga, Milaor, Minalabac, San Fernando, Gainza asin Rinconada area.

May mga broadcast tower na nagbagsak, estasyon na nagkararaot an signal asin nagpondo kan saindang broadcast.

Enot nadangog sana an duwang estasyon na saderi nin politiko.

Kan ikatolo natada na lang an estasyon na saderi nin negosyante.

An leksyon digdi sa mga taga broadcast media mayong kasiguruhan maski # 1, maski pinakapopular asin famuso an estasyon asin mga staffers ta kun nawawara sa aire nabalyo sa ibang estasyon maski maluya sa na basta may madangog na bareta lalo na sa kamugtakan kan panahon. Mayomg loyalty.

Sabi kan sarong taga radyo marhay/maraot na napondo an saindang broadcast ta nakapahingalo man sinda sa aro-aldaw na grabeng trabaho sa radyo sa pagkalap nin bareta asin pagbalangibog kaini sa mga namamanwaan. * * * Maogma ako asin nagpapasalamat ki Bong Franco, ki Alex Parfan, RonRon Enon, Jake Fortaleza, asin Victor Samson na nasa Amerika: Bikol Tribune asin Aniningal (publisher Jess Fortaleza), Bikol Hotline (publisher Edwin Basmayor), Naga City Post (publisher Anol Sadiua), Bandilyo (publisher Atty. Bentoy Manlangit), Aninaw (Danny Palomares), Iyo Ini (Atty. Luis Ruben General), Lagpitaw (Buboy Cirujano), Bikol Sun (Mario Ochoa), Naga Monday Star (Aristio Sonny Sales), Saligsig (Romy Esclante), asin Bikol Expose (Bong Franco).

Iba pang marhay asin maorag na parasurat….Roly Alano/Manila Bulletin, Ramon Imperial/Philippine Daily Inquirer, Buboy Ordas/Daily Globe, Joey Natividad/Today, Romy Dawal/ Malaya…. * * * Newsline/Jojo Villafuerte, Bikol Block/ Noel De Luna.

Victor Samson: Sa Nabua joven pa ako kalat na kalat an Bikol Examiner, Naga-based ni Magno Pasadilla na taga San Miguel Nabua.

Alex Parfan/ Naga Caller Times (publisher Gabby Casimero), Jake Fortaleza: an Bikol Tribune asin Aniningal (an publisher Jess Portaleza). * * * The Paper (publisher Joe Obias with Tess De Lima). Diyos mabalos saindo gabos.