Calamity fund kan LGUs naarahit kan Covid-19

Naghihinapos na an huring cuarto kan 2020 kadakle kan mga lokal na gobierno sa Camarines Sur haros maarahit na an calamity fund mantang igwa paman tada alagad panghapin na sana kun magpawalat pang bagyo antes matapos an taon na presente.

Sa Pili, Camarines Sur sinabi ni Alcalde Tomas Bongalonta dakulang bagay si pigtaong ayuda na P80-milyon na sarong bulan na internal revenue allotment (IRA) hali sa Bayanihan to Heal as One Act, gabos na LGUs igwang kaparejong ayuda hali sa gobierno nasyonal alagad pararejas an saindang problema sa pagkulang-kulang na nin calamity fund.


Awtorisado an LGUs na gamiton an calamity fund sa panlaban sa coronavirus disease na iyo an nakaubos-ubos kan saindang fondo sa calamidad alagad kan magrapado an sunod-sunod na bagyo sa Bicol kulang na an saindang fondo.


An solusyon mag-realignment nin fondo hali sa 20 percent development fund nganing iyo an itus-tos sa mga relief operations kan LGUs sa mga apektado kan super typhoon Rolly asin Ulysses.


Sinabi pa ni Bongalonta an tabang kan ibang mga politico siring ninda Diputado Gabby Bordado kan tercer distrito kan Camarines Sur, Senador Sherwin Gatchalian maging mga pribadong kumpaniya na nagdara nin mga donasyon nganing matabangan an apektado kan nakaaging mga calamidad.


Kabale sa mga LGUs na nagpahayag kan parejong problema sa calamity fund iyo an San Fernando, San Jose, Milaor, Magarao, Libmanan, Calabanga asin iba pa.


Kun marealisar an resolusyon kan junta provincial kan Camarines Sur na hinahagad sa Senado na gamiton na an fondo hali sa Bicol Rehabilitation Fund (BRF) na pugol kan gobierno nasyonal makakatabang sa problema sa kakulangan na nin calamity fund.


Gabos na LGUs sa Kabikolan milyon pesos an danyos agricultura asin infrastraktura sa mga nakaaging bagyong Quinta, Rolly, asin Ulysses. (dpa)