CALAMITY FUND NAARAHIT NA: Fondo sa pambakal dump truck gamiton pang ayuda

Pinapusog kan Sangguniang Bayan kan San Fernando, Camarines Sur an sarong resolusyon na igilid na muna an pagbakal nin pitong dump truck envez gamiton na muna pang ayuda sa manga residente kan viente dos na barangay na enterong apektado kan pagrapado kan bagyong Rolly asin Ulysses.

Naging ‘‘unanimous’’ an approval kan resolusyon asin pigsumiter na sa opisina ni Alcalde Fermin Mabolo kan Lunes, Noviembre 23 nganing pirmahan.

Ini an mga pahayag ni Bise Alcalde Allan Valenzuela matapos maarahit na an saindang calamity fund mantang ginamit sa paglaban sa coronavirus disease (Covid -19) asin kan nakaaging enot na super typhoon Rolly.

Sinabi ni Valenzuela an resolusyon pinagkasararoan kan mga consejal nganing i-realigned muna an cincuenta (50) por ciento kan siete milyones pesos na ibabakal nin limang dump truck.

An fondo kan taon pang 2019 na ibabakal nin mga dump truck kan LGU nganing gamiton na panhakot nin mga basura.

Nin huli kan dai pa nakakabakal nin bagong mga dump truck an epekto sa banwaan iyo an mga tambak na basura sa centro kan banwaan na walat pa kan mga nakaaging bagyo asin dai kinakaya kan saro sanang truck kan LGU.

Maging an saindang P1.5-M na Disaster Management Fund pig-realigned na nganing iyo an gamiton para sa mga relief operations sa mga biktima kan duwang nakaaging calamidad sa Bicol.

An katuyohan kan SB nganing matabangan an mga nagtitios na familia asin mga paraoma na enterong piglaila kan nakaaging duwang bagyo an saindang mga aanihon nang paroy asin iba pang produkto sa agricultura.

Afuera pa kaini dakul an nadestrosong mga harong na igwang mga totally damage asin partially damage na maninigo lang matabangan kan LGU.

Igwa man nag-aabot na mga relief goods hali sa ibang politico asin organisasyon alagad pighahalat man an dugang na ayuda kan LGU, sabi pa. (dpa)