NFA mayo nang kontrol sa presyo kan commercial rice

Pili, Camarines Sur --- Mayo na sa mandato kan National Food Authority (NFA) an kontrol sa presyo kan commercial rice kun maglangkaw man an presyo cada kilo matapos kan calamidad mantang hinali na sa sainda sa pag-epekto kan Rice Tariffication Law (RTL).

Maging sa stabilization functions o an pagsuplay nin NFA rice sa mga mercado nganing mapugolan an paglangkaw kan presyo kan commercial rice.

Si Nora Follusco, Assistant Provincial Manager kan NFA Camarines Sur nagsabi an saindang punsiyon sa mandato kan RTL iyo an maseguro na abunda an stock kan NFA rice nganing isustenir an suplay kun igwang calamidad.

Kun maging opurtunista ngonian an ibang negosyante nin bagas sa mercado matapos kan calamidad an presyo kaini kabali sa 11 commodities na nasa listahan kan price freeze asin si masinutil puedeng sangatan nin caso an multa.

Si Regional Executive Director Rodel Tornilla kan Department of Agriculture sa Bicol nagpahayag na an bagas kabale sa price freeze kan mga basic foods items kasunod kan declarasyon sa state of calamity kan mga lokal na gobierno sa rehiyon cinco.

An aksyon kan gobierno kasunod kan sunod-sunod na mga makukusog na bagyo sa rehiyon na ribo-ribong familia an apektado kan nakaaging mga calamidad.

Abunda an stock nin paroy asin bagas sa bodega kan NFA mantang 85 por ciento kan mga naani nin paraoma sa Camarines Sur nabakalan kan ahencia antes pang magrapado an duwang bagyong Rolly asin Ulysses.

An arin man na persona o negosyantes na naprobaran nag-maniobra kan presyo na kabale sa basic food items nagtago asin pagpalangkaw kan presyo na disbentaje sa consumedores papamultahon nin P5,000 hasta sa P2 milyon asin puede pang mapriso nin lima hasta sa quinceng taon. (dpa)