top of page

2023 annual budget kan CSur mababa nin P400-M

Nagbaba nin Php400 milyones an propuestong 2023 annual budget kan lokal na gobierno kan provincia nin Camarines Sur epekto pa ini kan pagbagsak kan economia kan nasyon huli kan duwang taon na pandemya.


Sinabi ni Vokal Romulo Hernandez, Vice Chairman kan Committee on Appropriation sa junta provincial an dakulang milyones pesos na paghuros kan annual budget kasunod man kan pagbaba kan cantidad sa dapat na marerecibing National Tax Allotment (NTA) hali sa Department of Budget and Management.


Saiya pang pigbuyagyag na si dating Php.5.5- bilyon na 2022 annual budget mababa nurong taon sa aaprubaran na propuesto sa cantidad na sanang Php5.1-B.


Bako lang an LGU Camarines Sur apektado kan paghuros kan saindang marerecibing NTA envez gabos na LGUs sa nasyon huli kan pagbaba kan koleksyon sa buwis kan taon 2021-2022, kabali pa ngani digdi an pagpoon kan Covid-19 kan 2019.


An aksyon kan gobierno provincial iyo an pagbawas nin budget sa mga department na kaipuhan magtipid an provincia mientras nagbaba an saindang masunod na 2023 annual budget.


Ngunian na taon naglangkaw an saindang NTA maging iba pang LGUs huli kan Mandanas-Garcia ruling kasunod kan desisyon kan Corte Suprema na dapat igwa man nin kahirasan sa marerecbing buwis an mga LGU hali sa koleksyon nasyonal, sabi pa ni Hernandez.


Alagad sa sunod na annual budget sa 2023 apektado sa bagsak na koleksyon nin buwis. (dpa)

Comments


bottom of page