top of page

22K mga senior citizen sa Naga makakaboto sa EVH

Abot sa 22,247 mga rehistradong botantes na senior citizen sa Comelec kan Ciudad nin Naga an makakaboto nin amay sa Early Voting Hour (EVH) sa nakatalaan na Barangay, Sangguniang Kabataan Elections (BSKE) sa Oktubre 30, 2023 alagad maabot sa 900 na PWDs asin dai pa kabali sa bilang an mga bados nakaayon sa tinututogan amay makaboto.


Sinabi sa Bicol Mail ni Abogado Maico Julia Jr. Election Officer kan ciudad an Naga asin Ciudad nin Muntinlupa iyo sana an duwang pilot voting center sa nasyon nganing makaboto an sinambit na mga sektor poon alas 5:00 hasta alas 7:00 nin aga.


An resulosyon kan Commission on Election para sa Early Voting Pilot Center sarong testing na kun maging epektibo nakatalaan i-adaptar sa mga masunod na ehersisyo pulitikal maging sa local asin national elections.


Dakulang kagiaan an bagong programang ini kan commission lalo na sa tolong sektor nganing makaparticipar sa maabot na pirilian, sabi pa ni Julia.


Sa lado kan senior citizen, si Jimmy Reblando pamayo kan opisina kan Senior Citizen sa Ciudad nin Naga nagpahayag dakulang ginhawa an programang ini nganing dai na makisusoan an saindang pag-iriba sa sektor na mawot pang magparticipar sa ehersisyo pulitikal.


Naglalaom an sinambit na sektor na dapat iimplementar na ini sa mga maabot pirilian.


Mientras tanto, pigtalaan na kan Comelec kan ciudad an training/seminar kan labi sa 900 na miembros kan electoral board sa maabot na Oktubre 8. Objetivo kaini nganing maaraman kan mga paratukdo na maserbe sa eleksyon sa Oktubre 30 an saindang mga responsabilidad.


An campaign period kan mga candidato sa barangay asin SK pigtalaan sa Oktubre 19 hasta Oktubre 28.


bottom of page