29 barangay malinig nasa droga

Nagkapera nang mga barangay sa Camarines Sur an drug cleared barangay na pigkumfirmar na kan Philippine Drug Enforcement Agency (PDEA) asin Municipal Police Stations asin LGUs.

Igwa naman nin dugang na 29 mga barangay na drug cleared asin base sa listahan kan saindang Municipal Police Station (MPS)sampulo sa Tinambac, pito sa Libmanan, tig-arapat sa Lupi, Sipocot asin Baao, asin saro sa Ocampo, gabos digdi sa Camarines Sur.

Sa Sipocot, Camarines Sur nadagdagan naman nin apat na barangay an dating limang drug cleared barangay na kinumfirmar na kan MPS sa banwaan na ini asin kan PDEA.

Dai ini mangyayari kun mayong cooperasyon an mga comunidad maging man an opisyales de barangay asin iba pang mga sektor, sa kan MPS.

Si Police Major Ronald Brugada, jefe de pulisiya kan MPS Sipocot asin Police Major Dominic Borigas kan MPS Tinambac na realisar an bagay na ini sa tahaw kan higot nindang kampanya asin cooperasyon kan publico laban sa ilegal na droga.

An drug cleared na mga barangay sa Sipocot kinababalihan kan Gaongan, San Isidro, Calampinay asin San Isidro.

Sa ibang mga banwaan dai na pigngaran an mga barangay.

Sinabi pa kan duwang jefe de pulisiya na nagpapadagos pa an saindang actividades contra sa ilegal na droga nganing madagdagan pa an drug cleared barangay.

An ilegal na droga saro sa causa kan incidente nin kriminalidad asin dakulang bagay na igwa nang mga drug cleared barangay nganing malikayan an manlaen-laen na krimen asin piglalaoman igwa pang masunod na barangay.

Suportado kan mga lokal na gobierno an kampanya laban sa droga alagad dawa na ngani naglalangkaw pa an caso sa coronavirus disease an paglaban sa droga dapat dai mapabayaan.

An PDEA Bicol padagos man sa pag-enganyar sa mga LGUs na suportaran an kampanya sa ilegal na droga nganing mahiwas na an mga barangay na kontrolado na sa ilegal na actividad.