2K bagong botantes sa BSKE target kan Comelec

Ciudad nin Naga --- Piglalaoman an dugang na dos mil (2,000) na maparehistrong mga botantes sa ciudad na ini para sa nakatalaan na Barangay, Sangguniang Kabataan Elections (BSKE) mantang pigtalaan na sa Hulyo 1 hasta Hulyo 11, 2025 an voters registration.

Si Abogado Maico Julia Jr., Election Officer sa Naga nagpahayag na sampolong aldaw sana an pigtaong plaso kan commission nganing magparehistro asin makaparticipar sa BSKE.

Kan nakaaging midterm elections iguang 121,743 rehistradong botantes an ciudad.

Nagtutubod an Election Officer kan ciudad na dai na mapaluwas nin extension an saindang opisina sentral huli ta limitado na sinda sa preparasyon kan eleksyon na pigtalaan sa Deciembre 1.

An mga dapat magpalista si mga nag-eedad poon sa 15 hasta 17 anyos sa lado kan SK asin 18 anyos pataas sa mga regular na botantes.

An pagpalista kabale an reactivation, transfers, asin bagong mga aplikantes.

Sa isyu kan posibleng mauktaba an nakatalaan na BSKE, sinabi kan Comelec na naghahalat sana sinda kan magiging desisyon kan congreso .

Lusot na sa bicameral conference committee an pigtutulod na pag-uktaba kan pirilian alagad iguang cuestiyon huli ta igua nang desisyon an Corte Suprema na prohibido na an pag-uktaba kan pirilian sa BSKE.