2K familia nakarecibe relief goods

Maabot sa dos mil na familia na pinalakma kan bagyong Rolly asin Ulysses an saindang kaharongan sa Bato, Catanduanes an naging resipiyentes kan mga food packs asin iba pang ayuda sa duwang aldaw (Noviembre 30-Deciembre 1) na relief operations kan KBP Camarines Sur asin Bangon Bato Catanduanes Advocates.

An mga ayuda lunad sa duwang Philippine Army truck kan maghali an grupo ala una nin agang amay kan Noviembre 30 mantang sinabat sinda kan opisyales lokal asin barangay kan LGU Bato.

Si Pipo Evangelista taga Pandan, Catanduanes kabali sa grupo na nagdara kan relief goods nagsabi na maabot sa veinteng mga barangay an saindang pigdarahan nin mga ayuda an mga biktima kan calamidad.

An KBP Camarines Sur na pinamamayohan ni Bong Echalose asin an mag-agom na Pipo Evangelista kan Bangon Bato Catanduanes nagtarabangan nganing makakalap nin donasyon hali sa manlaen-laen na grupo asin sektor sa Ciudad nin Naga asin Camarines Sur.

Katuwang sa pagkalap nin relief goods iyo an DepEd na kinababalihan kan Public Elementary School Association, Public Secondary School Principal Association, Naga City Teachers and Employees Association, mga pribadong escuelahan, NGO asin Bato Central Elementary School Alumni kan Bato, Catanduanes.

An LGU Bato sa pamamayo ni Alcalde Juan Rodulfo nagpaabot man nin pasasalamat sa grupo asin iba pang organisasyon na padagos pa kan saindang pagtabang.