2k miembros kan PPO Camarines Sur iwawarak sa eleksyon

Preparado na an Camarines Sur PNP Provincial Office sa dos mil na kapupulisan na iwawarak sa 960 na polling center sa maabot na eleksyon nasyonal asin lokal asin igwa pang piglalaoman na dugang na 800 na miembros kan augmentation force.

Bako lang miembros kan PNP an mamanternir kan paz orden alagad igwa man augmentation force na ipapadara an 9th Infantry Division kan Philippine Army na may base sa Camp Elias Angeles, Pili, Camarines Sur.

Ini an mga pahayag ni Police Lt. Col. James Ronatay, opisyal na parataram kan PPO Camarines Sur alagad an saindang operasyon na may relasyon sa eleksyon igwang koordinasyon sa Commission on Election.

Kasunod kan saindang pag-andam sa maabot na pirilian sa Mayo 9, 2022 binanga sa apat na kategorya an 35 banwaan asin duwang ciudades sa provincia.

Sinabi ni Ronatay sa election areas of concerns, 13 mga banwaan an pigdeclara na nasa Category Green, boot sabihon ‘‘no security concern’’ mantang mayong record na election related kan nakaaging duwang eleksyon.

Tolo an yaon sa Yellow na inaapod na ‘‘area of concern’’ na nagkaigwa nin insidente na may relasyon sa eleksyon sa mga nakaaging duwang pirilian lokal asin nasyonal asin konsideradong mayong problema sa insurhencia.

Alagad igwang 17 na nasa ‘‘orange category’’ si mga lugar na nasa listahan kan ‘‘area of immediate concern’’, asin ini kumbinasyon kan nasa Yellow Light na may homa sa rebeldeng New People’s Army alagad tolo sana an nasa red o ‘‘area of grave concern’’ na kunsideradong may homa pa sa mga kalaban kan gobierno.

Nagsayumang ngaranan kan PPO an mga banwaan na pigbaranga sa apat na mga kolor nin kategorya nganing mayong pag-alarma sa mga votante sa maabot na eleksyon asin yaon na sa poder kan PNP asin Comelec.

An PNP asin 9th ID sa Bicol igwa nang koordinasyon kan saindang tropa sa iwawarak na mga awtoridad sa mga polling center.

Antes pa kan eleksyon sa Mayo 9, igwa nang nakadestinong mga pulis sa mga escuelahan o polling center. (dpa)