2K na kapulisan presente sa syudad nin Naga sa Traslacion asin Fluvial procession

Ni Paulo DS. Papa

POSITIBO an Philippine National Police sa syudad nin Naga sa saindang hinahagad na pokumas o menos 1,500 personahes komo augmentation force durante kan mga mayor na actividades religiosos kasumpay kan Peñafrancia fiesta sa Setyembre.

Segun ki PLTCOL Elmer Azurez Jr., an jefe kan City Community Affairs and Development Unit kan Naga City Police Office (NCPO), by principle aprubado kan oficina regional kan pulisya an request kan PNP sa syudad para sa dugang fuerza asin seguridad kasabay kan Traslacion asin Fluvial processions.

Pigheras ni Azurez na an mismong Police Regional Office V an naghahagad nin datos sa PNP-Naga na nagpapaheling kan numero nin police personnel na kakaipuhanon komo katuwang kan kapupulisan sa syudad sa pagmantenir kan paz y orden durante kan mga nasambit na actividades.

Iyan afuera pa sa areas asin fetsa kan deployment kan mga mabarantay na pulis hale sa manlaen-laen na oficinas kan PNP sa Kabikolan.

Laen pa kaini, magigin full force an deployment kan NCPO personnel sa luwas kan saindang mga oficina - nagpakol sa pocumas o menos 1,000 kapulisan na nakadestino sa syudad.

Mientrastanto, pighahasi kan pulisya sa syudad katuwang an iba pang mga katuwang na ahensyas de gobyerno an mga lakdang para sa kapormalan durante kan Traslacion asin Fluvial processions sa andas kan Nuestra Señora de Peñafrancia asin El Divino Rostro.

Segun pa ki Azurez, saro sa mga nailawan durante kan congingency planning asin tabletop exercise kam sarong semana sa Basilica Minore, saro sa mga nailawan an pagsakat kan ibang mga voyadores sa andas kan duwang ladawan.

Huli digdi igwa nin pighaman na mga estratehiya na kaipuhan pang himay-himayon sa paagi kan mga itatalaan na mga pag-orolay sa lado kan seguridad sa kafiestahan.

Katakod kaini, pigheheling kan pulisya an kulungan ng mga lasing komo saro sa mga posibleng ibalik durante kan mga nasambit na actividad kan mga nakaaging panahon.

An Campo Crame nakaresibe na man kan kahagadan kan opisina kan pulisya sa syudad nin Naga mapadapit sa signal jamming durante kan mayor na aktibidades kan Peñafrancia fiesta magin an propwestong gun ban sa otro bulan.