2K pasajeros aroaldaw nagbababa sa terminal

Nagdadagsa na an nagaarabotan na pasajeros sa Bicol Central Station (BCS) ngunian na panahon nin Semana Santa hale sa National Capital Region (NCR) maging sa ibang provincia.


Sa daily average labi na sa dos mil na pasajeros an nagbababa sa BCS mantang igwa nang cincuentang pampasajerong bus an viaje aroaldaw na naging paborable sa sainda maging pasajeros huli sa Alert level 1 classification na sa Ciudad nin Naga asin Metro Manila.


Alagad posibleng madugang pa an nagaarabotan na pasajeros mga sarong aldaw antes kan Jueves santo.


Ini an mga pahayag ni operation manager Roderick ‘‘Nonoy’’ Reforsado mientras na padagos na mantenido an implementasyon sa health and safety protocols dawa nagbaba na an alert level classification kan ciudad alagad sa Camarines Sur sa 35 mga banwaan nagkapera pa sana an binaba sa Alert level 1 na kinababalihan kan Bombon, Cabusao, Camaligan, Presentation, San Fernando asin Ciudad nin Iriga.


Luway-luway nang nakakabangon an revenue kan manijamiento kan terminal matapos malugi sa laog nin duwang taon huli kan pandemya asin apektado man si mga tsuper asin operator kan bus company.


Maging man si mga stall owners nakakabawi na mientras nagbabalik na an saindang mga parokyano.


Pinahayag man kan mga tsuper nin trimobile sa BCS na nakakatabang sa saindang aroaldaw na pagkayod an nagdadakul na pagarabotan nin pasajeros.


An mga booking office kan bus company sa BCS dakul na an nagpipirila nin amay nganing magpa-reserba kan saindang viaje pabalik sa NCR pakatapos kan semana santa.