3 banwaan sa Partido area binisita ni RD BGen Obinque

BINISITA ni Police BGen Westrimundo Obinque, regional director kaibanan si PLTCOL Eric Ortega an mga banwaan sa Partido area kan ika-apat na distrito kan Camarines Sur na dinadayo nin mga turista sagcod nagkurtesiya sa mga jefe ejecutivo.

Kabali sa saiyang pigbisita iyo an mga banwaan kan Caramoan na dagos nang nagkurtesiya ki Alcalde Marilyn Co; San Jose na nagkurtesiya ki Alcalde Jerold Pena asin Goa na nagsungko sa opisina ni Alcalde Marcel Pan sa kaparehong katuyohan.

Pig-aram kan heneral an kamugtakan kan paz y orden asin kooperasyon kan kapupulisan sa mga lokal na gobierno. Alagad mayo man nin reclamo an mga jefe ejecutivo mantang matuninong an paz y orden.

Afuera kan pagbisita sa LGUs kan nakaaging aldaw nagkonducir nin pagbibisita sa mga Police Stations asin nagkaigwa nin diyalogo sa mga personajes kan Caramoan MPS, San Jose MPS asin Goa MPS. Inaram kan heneral an kampanya sa paz y order, paglaban sa mga kriminalidad asin an mga ginigibong lakdang kan law enforcement sa kapalibotan.

An heneral nagkapera nang mga banwaan sa Camarines Sur asin iba pang mga provincia kan Bicol an saiyang binisita nganing maaraman niya mismo an kamugtak bako lang sa paz y orden, problema sa insurhencia, maging kampanya laban sa ilegal na droga.