3 brgy sa Naga ibabale sa face-face-to-classes

Tolong mga barangay an pigrerecomendar kan City Hall na makabale sa face-to-face classes kan Department of Education (DepEd) na iimplementar sa Enero 2021.


Si Alcalde Nelson Legacion nagpahayag sa miembros kan prensa na saiyang pinapaboran an mga escuelahan sa itaas na mga barangay kan Carolina, San Isidro asin Panicuason na gibohon na an limitadong face-to-face classes mantang zero sinda sa ngonian sa coronavirus disease.


Alagad sinabi man ni DepEd Superintendent Manny De Guzman an napili ninda asin pigrecomendar iyo an Teodoro Moscoso Elementary School sa brgy. Carolina.


Magdedefende sa recomendasyon kan City Hall mantang kaipuhan kan DepEd an resolusyon kan Sangguniang Panlungsod nganing aprobaran kan central office asin IATF na makaayon sa dry-run kan klase sa Enero 11-12, 2021.


Mandato kan central office kan DepEd na dapat ipasunod an health protocol alagad kaipuhan man giraray an permiso kan magurang kun tutugotan ninda an aki sa ‘‘in person classes’’.


Nagkaigwa man nin caso sa Covid 19 sa itaas na barangay alagad dai naman pinuli an pasyente sa saindang residencia envez sa quarantine facility kaya ngani mayong peligro digdi na ibuelta na an klase sa classroom, sabi pa kan jefe ejecutivo.


An problema kan ibang mga estudiante sa online classes iyo an internet connectivity kaya pabor sa magurang na idagos na an klase sa classroom.


Alagad piglinaw kan DepEd na igwa pang blended learning mantang pilot project pa sana ini asin hahalaton pa an iba pang mga rekomendasyon kan IATF asin central office.