3 candidatong director sa Casureco 2, discalificado

Tolo sa anom na mga candidatong director kan Camarines Sur II Electric Cooperative (Casureco II), Inc. iyo sana an calificadong candidato sa pigtalaan na district elections sa Hulyo 23.


An tolo kinababalehan ninda incumbent directors Nick Oriño kan Magarao District mantang an masabat sa saiya sa pirilian iyo si Raymond Obiada asin sa Naga North District si incumbent director Jun Cornelio na mayo nang kalaban matapos ibasura kan Screening Committee kan Casureco II an candidatura kan duwang nag-file kan saindang certificate of candidacy.


Si Rinner Bucay, opisyal na parataram kan cooperativa nagsabi na si duwang candidatong director sa Naga North District binasura kan Screening Committee na pinamamayohan ni Joan Sabanal mantang kaparejo man sa Bombon na solo sanang candidato alagad discalificado.


An mga pangaran kan mga discalificadong candidato dai naman nginaranan ni Bucay.


Alagad an enot na nagluwas na pangaran na candidato sa Naga North District, Ms Melva Popanes kabale sa mga discalificado.


Sinabi pa mientras na igwa pang oras, si Popanes nagsangat na kan saiyang letter of appeal sa National Electrification Administration (NEA) mientras na si iba pang candidato hinahalat ninda an noticia.


Base sa Acta Republica 10531 kan NEA, sinabi kan screening committee na halabaon an listahan kan mga rekisitos nganing maseguro na calicado an macandidato sa cooperative.


Nagkapera sa estrictong pinapasunod na dapat an sarong candidato na mayong utang sa electric bill sa laog nin tolong bulan; dapat nag-aatendir sa Annual General Membership Assembly sa laog nin tolong magkasuronodan na AGMA asin naggradwar sa apat na taon na kurso sa kolehiyo. (dpa)