top of page

3 LGUs nagpalangkaw sa presyo kan paroy

Tolong local government unit (LGUs) sa Bicol nagpabulos nin asistencia finansyal sa National Food Authority (NFA) nganing mas halangkaw an presyo kan paroy na pinako kan ahencia.


An NFA Camarines Norte iyo an pinakalangkaw na presyo sagcod sa P31.00 cada kilo kan paroy nin mga paraoma.


Sa pinakahuring presyo sa palay procurement kan NFA cantidad P23.00 – P26 (bagong ani saka alang) cada kilo mantang an LGU Camarines Norte na nagtagama nin P5.00 cada kilo huli kaini sa presyong P26.00 kan ahencia igwa nang total na P31.00 cada kilo. An iba pang LGUs kinababalihan kan Malinao, Albay – P2.50 cada kilo; saka Barcelona, Sorsogon – P1.00.


Sa entrevista kan Bicol Mail ki Jaharah Revilla-Pavilando, regional information officer kan NFA Bicol an sinambit na LGUs dati nang nagpapabulos nin fondo sa palay procurement kan ahencia antes pang nagdugang si presyo kan paroy ngunian na bulan.


An iba pang LGUs pinadarahan nin kaparejong propuesto kan NFA Bicol alagad mayo pang kasimbagan alagad an ahencia nagtutubod na igwa pang masunod na LGUs mantang dakulang tabang ini sa paraoma.


An NFA Council dai palang nahahaloy nagpaluwas nin directiva sa saindang mga branch offices sa nasyon na iimplementer an bagong presyo sa P23.00 – 26.00 cada kilo kan paroy.


Digdi sa Rehiyon Bicol an presyo sa mga pribadong kumprado an bakal kan paroy cantidad P23.00 hasta P26.00 na apektdo na an palay procurement kan ahencia mantang nakapako sana an saindang presyo sa P19.00.


Dai pa nin reaksyon an sektor nin paraoma sa pagpalangkaw kan presyo sa paroy sa tahaw kan saindang reclamo na dai man nakatabang sa sainda an Rice Tariffication Law huli ta bagsak an presyo kan paroy orog na kun panahon nin aranihan.


An RTL inaprubaran kan Febrero 14, 2019 sa administrasyon Duterte apesar kan mga pagcontra kan sektor nin paroma maging empleados kan NFA asin iba pang sektor.


Sinabi kan Department of Agriculture halangkaw an produksyon nin bagas sa Bicol mala ngani nagsusuplay nin bagas sa ibang rehiyon. (dpa)


NFA nagpapabakal nin baratong presyo kan bagas kun igwang Kadiwa ng Pangulo asin kan magbisita sa Camarines Sur si PBBM. (NFA Bicol)


Comentarios


bottom of page