308 mga kahoy sa road right of way naputol na kan DPWH

Apesar kan pinaheling na panindugan kan environmentalist contra sa pagputol nin mga puon nin kahoy sa road right of way kan national road alagad nagluluwas na ‘‘inconsistent’’ sinda kun babasehan an record kan DPWH 3rd Engineering District sa Camarines Sur na nakaputol na nin total na 308 kahoy bako lang sa centro kan ciudad maging sa itaas na mga barangay.


Ini an tuyaw ni Consejal Joselito Del Rosario kan kumfirmaron ni District Engr. Romeo Doloiras sa sesyon kan Sangguniang Panlungsod an total kan saindang nakapurotol na pigpunan kan dating DE Rebecca Roces mantang nag-iimplementar kan mga road widening project.


Igwang insidente na nagpaluwas nin ‘‘environmental protection order’’ an corte alagad nakapurotol na si kahoy sa gilid kan tinampo na sakop ka road right of way.


Si Doloiras, bisita sa sesyon kan SP nganing mag-report sa kamugtakan kan saindang road widening project asin sa isyu ‘‘cutting of trees’’.


Sinabi kan consejal ‘‘haen na si mga environmentalist dakul na an mga nagkapurotol, inconsistent sinda’’ alagad nagtindog man si Consejal Mila Raquid-Arroyo nganing contrahon an mga pahayag ni Del Rosario. Saiyang sinabi ‘‘dai ka magsabi na inconsistent an environmentalist mantang sulo-sulo siyang nagsusurog sa SP nganing suportaran an environmentalist.


Admitido ni Arroyo na daog siya sa bilang sa borotohan sa SP mayo siyang magiginibo an nasusunod iyo an ‘‘majority rule’’.


Dinagdag pa kan DPWH saro nalang na kahoy an dai pa napuputol sa barangay Peñafrancia asin San Felipe road huli kan ‘‘environmental protection order’’ kan corte.


Igwa naman pendienteng puputolon na mga kahoy sa Concepcion Grande-Del Rosario national road na naghahalat nalang maaprubaran an saindang aplikasyon sa permit hale sa DENR Bicol.


Sinda Consejal Ghiel Rosales asin Arroyo iyo sana an nangenutan contra sa pagputol nin kahoy digdi alagad mayoria kan miembros sa SP pigpaboran na purotolon an mga puon nin kahoy na ulang sa road widening project.


Sinabi ni Consejal Salvador Del Castillo arin an dapat tawan atensyon an buhay nin tawo o puon nin kahoy. Nagkapera nang mga aksidente sa trafico an nakakabudal sa sagcod nagiging kritikal an pasyente asin igwa pang binabawian buhay.


An opisina rehiyonal kan DPWH iyo an ma-implementar kan road widening project sa Concepcion Grande-Del Rosario road alagad naghahalat nalang sinda kan cutting of trees permit hale sa DENR. (DPAureus)