350 escuelahan preparado sa pilot face-to-face classes

Igwang mga naka-andam an Department of Education (DepEp) Bicol na mga escuelahan para sa pilot face-to-face classes ano man na oras magtugot si Presidente Rodrigo Duterte na mayoria hale sa mga remote barangay kan Camarines Sur na low risk sa coronavirus disease (Covid-19).

Si Director Gilbert Sadsad nagpahayag na base sa pinakahuri nindang datus igwang total na 350 escuelas publika sa Bicol alagad maabot sa cuarenta por ciento hale sa Camarines Sur, mantang igwa man sa Sorsogon, Masbate, Catanduanes asin Albay.

An Parent Teachers Association (PTA) sa hararayong barangay napag-araman na saindang pinapaboran an pagbuelta na kan face-to-face classes mientras na an reclamo ninda na ‘‘lawgaw’’ an pag-adal nin mga estudiante sa blended learning.

Tigsararong public school sa mga ciudad kan Naga, Legazpi, Iriga, Tabaco, Sorsogon asin Masbate mientras na an ciudades na ini yaon sa urban area na may halangkaw na caso kan coronavirus disease.

Sa Ciudad nin Naga na igwang cincuentang (50) public schools solamente an elementary school sa itaas na barangay kan Carolina an pigrecomendar ni City School Division Superintendent Manny De Guzman.

An DepEd Bicol nagrecomendar na ki Secretary Leonor Briones an sinambit na mga escuelahan na preparado sa pilot face-to-face classes alagad ano man na pagtugot maagi man giraray ki Presidente Duterte.

Sa Sorsogon, sinabi ni Goberndor Chiz Escuedero na maninigo na an physical classes sa saindang provincia mantang 55 por ciento kan saindang mga barangay zero sa caso sa Covid-19.

Sinabi pa ni Sadsad na preparado na an mga escuelahan an sinambit na mga escuelahan sa gabos na health and safety standard na pigmamando kan National Inter-agency Task Force. (dpa)