3rd wave kan ASF posibleng mangyari

An Department of Agriculture (DA) nagpatanid sa publiko na dai maging kampante kun nagbababa na an caso kan African Swine Fever (ASF) Bicol, dai mag-asa na tapos na alagad may posibilidad na magkaigwa nin 3rd wave mantang mayo pa nin bakuna laban sa virus sa hayop.


Dawa na sa coronavirus disease (Covid-19) igwa nang suplay nin bakuna naglalala pa an caso.


Si Emily Bordado, opisyal na parataram kan DA Bicol nagpahayag sa Bicol Mail na dapat dai maging kampante boot sabihon yaon pa an problema sa ASF.


Nganing perming atesbado an mga hog growers o para-atamang orig seguradohon na regular na piglilinigan an mga tangkal tanganing mahale an posibleng mga nagiging causa nin bakterya.


Kinakaipuhan kun igwang naheheling na iba an mate kan hayop o posibleng may helang ipaabot tolos sa saindang mga municipal veterinarian, sabi pa kan DA.


Sa pahayag man ni Dr. Alex Templonuevo, OIC Regional Director kan National Meat Inspection Service (NMIS), saro nakatabang nganing makontrol an pagparalangkaw kan caso sa ASF iyo an pagbugtak nin mga checkpoint nganing ma-monitor an pig-tatransportar na hayop.


Afuera kan pig-isyung mga executive orders asin ordinansa kan mga LGUs, nagiging estricto sinda sa pagbawal kan paglaog kan viajeros na nagbabakal nin mga orig para i-transportar na dapat yaon sana sa sarong pickup area.


Base sa report kan Regional Quick Response Team (RQRT) for Animal Disease Emergencies sa kumfirmasyon sa resulta kan laboratory year. An pagbaba kan caso nanotaran puon kan Enero ngunian na taon na igwang 76 na caso, Febrero – 46 na caso, Marso igwang anom na caso, Abril tolong caso asin duwa kan nagtalikod na bulan nin Mayo.


Sinabi pa kan DA puon na magbungkaras an caso sa ASF digdi sa Bicol kan Febrero 2020, igwa nang 64 apektado municipalidades sa anom na provincias kan Kabikolan.


An ahencia nakabayad na nin P71.4 milyon na ayuda sa mga paraoma na piggaradan si mga ataman na hayop nganing dai na magpara-ulakit an virus.


Mantang nagbababa na an caso, an DA nakatalaan mag-implementar kan inaapod na Recovery, Rehabilitation, and Repopulation Assistance Program sa mga apektadong lugar kan ASF kasunod kan pinaluwas na guidelines sa Administrative Order No. 6 na pig-isyu ni DA Secretary William Dar kan Febrero 10, 2021. (dpa)