4 kaalyado ni Migz nagbalyong kudal

APAT na mga kaalyado sa politica ni Gobernador Migz Villafuerte an nagbalyo na sa campo ni dating Majority Floor leader Rolando Andaya Jr.

Sa tiripon kan grupo ni diputado Rolando Andaya sa Primus Hotel sa barangay Pacol, Ciudad nin Naga kan Domingo hapon, Febrero 7 sinda Vocal Nelson Julia kan segundo distrito kan Camarines Sur, Bise Alcalde Marilyn Sotto kan Pasacao asin dating ABC President asin Consejal Jep Pasodillo kan Bombon, dating Consejal Wilma Carius kan Libmanan asin na anas mga kaalyado ni Gob Villafuerte nag-atendir sa tiripon kan mga alcalde, bise alcalde, consejales asin vocal na kaalyado ni Andaya nganing ipaheling an suporta sa grupo ni Andaya.

Sinabi ni Andaya na nagkapera pang mga lider kan mga Villafuerte an nagpapatos-patos naman nganing magbalyong kudal.

Si Julia, nag-ayon na sa grupo kan oposisyon sa junta provincial na kinababalehan ninda Vocal Awel Llaguno, Trexie Clemente, Jayjay Pilapil asin Ruperto Alfelor.

Si Sotto, ultimo nang termino bilang bise alcalde posibleng iyo an magcandidatong alcalde kan Pasacao sa campo ni Andaya.

Dai palang nahahaloy si dating bise gobernador Ato Peña na loyalista kan mga Villafuerte nagtatrabajo na sa opisina ni Alcalde Tom Bongalonta kan Pili, CamSur.

Si Bongalonta contra partido ni Gob. Villafuerte.

Pig-osipon ni Peña na sinahotan siya ni Villafuerte na nagtabang sa bakong candidatong alcalde kan Capitolio sa saiyang tugang na si Jerold Peña sa San Jose, Camarines Sur alagad saiyang pinahimutikan nin huli ta nagsusunod siya sa party discipline.