4 na banwaan sa CSur nagpapirma sa PI

Apat sana sa 36 na mga municipalidad asin duwang ciudad sa Camarines Sur nakakalap nin pirma para sa people’s initiative (PI) sa pigtutulod na charter change antes nagpaluwas nin orden kan Enero 29, 2024 an Commission on Election (Comelec) na nagsususpendi sa pagrecibe nin signature sheets.

Base sa pinaluwas na listahan kan Comelec Bicol na pinamamayohan ni Regional Director Atty. Maria Juana Valeza an mga banwaan na ini kinababalihan kan Goa, Lagonoy, Tigaon, asin Presentacion gabos kan Partido area sakop kan congressional district ni Representante Arnie Fuentebella.

Sinabi ni Election Officer Dionisio O. Miguel kan Goa, Camarines Sur na paborable sa sainda an desisyon kan main office sa tahaw kan saindang pigtatawan nin prioridad an continuing registration na mapoon sa Febrero 12 hasta Septiembre 30. An pagrecibe kan mga aplikante komo pag-andam sa eleksyon lokal asin nasyonal sa Mayo 2025.

Sa Comelec Bicol, sinabi ni Director Valeza kun dai iginilid an pagrecibe kan signature sheets mababanga an saindang trabajo mantang apektado an pag-ako kan mga aplikante na mapalista bilang botante sa maabot na eleksyon sa 2025.

Sinabi pa kan Comelec sa anom na provincias kan Kabikolan bako gabos na mga municipalidad an nakasumiter nin signature sheets sa mga opisina lokal kan Comelec.

Nagrecibe sinda kan signature sheets poon kan Enero 10, 2024 alagad saindang pinondo kan magpaluwas nin orden an saindang opisina sentral.

Nagkaigwa sanang controvercia sa Albay kan pigbuyagyag ni Congressman Edcel Lagman na binabayadan nin P100.00 an cada mapirma sa people’s initiative.

An dahilan kan orden kan Comelec main office mantang pendiente pa an saindang ginigibong pag adal sa iluluwas na bagong guidelines sa tahaw kan controvercia sa ngunian sa sahot na nagkaigwa nin barayadan nganing magpirma para sa people’s initiative na nagtutulod nganing enmiendahan an 1987 constitution. (dpa)