400k natatadang dai nagpapalista sa PSA CS

An Philippine Statistics Authority (PSA) Camarines Sur nagbaba na sa mga barangay sa nagpapadagos na pagpalista sa Philippine Identification System (Philsys) nganing aboton an pigkakarkulong nawawalat na 400 mil na residentes na dai pa nagrerehistro.

Alagad an natatada pang dai nagpapalista dai cierto kun mapasiring sa saindang mga Philsys registration centers sa barangay mientras dai man mandatory sa gabos na Filipino base sa RA 11055 o an Philippine Identification System Act.

Sinabi sa Bicol Mail ni Raul Aspe, jefe kan PSA Provincial Office sa saindang datus sagcod kan Deciembre 2023 labi na sa 1.7 milyon an nagpalista mantang nadadagdagan pa an bilang kan Enero, Febrero asin ngunian na Marso 24.

Sa datus man sa PSA Bicol maabot na sa 4.59 milyon na indibiduwal an nakapalisa poon kan taon 2021.

An Philsys number permanante o confidential na dai dapat ibuyagyag.

An ahencia enot nang nagtugot poon kan Febrero 23, 2023 an walk-in registration base sa directiva kan saindang opisina sentral. Nagbugtak nin registration center cada municipio asin ciudad.

An mga natatada pang mapalista dapat magdara nin identification card asin iba pang dokumentos nganing tubodan kan saindang identity.

Sa ngunian segun pa sa PSC naglilibot sinda sa mga barangay nganing maparani sa mga residentes asin magpalista sagcod na an saindang personajes naglilibot sa mga harong-harong. (dpa)