44 opisyal kan PNP dai pinalibre sa drug test
Kasunod kan isyu sa pagkaka envuelto kan ibang mga opisyal kan PNP sa ilegal na droga, an Camarines Sur PNP Provincial Office pinasikadan an ‘‘cleansing’’ sa organisasyon sa paagi kan surprisang drug test sa 36 na mga jefe de pulisya kan Municipal Police Stations asin kabale na si mga jefe kan Mobile Force na igwang total na 44 mga opisyal.
Si PCol. Julius Cesar Domingo, Provincial Director nagpahayag an saiyang ‘‘cleansing’’ contra sa arin man na miembros na maging kasabwat man o envuelto sa ilegal na droga bilang suporta sa kampanya ni PNP Chief PGen Benjamin Acorda Jr. laban sa droga.
Saiyang pinatanidan na siisay man naprubaran na positivo o naggagamit nin droga isusunad sa disciplinary action sagcod na sipaon sa serbisyo.
Si PD Domingo pinaabot sa Camp Semion Ola sa Ciudad nin Legazpi an saiyang mga ginigibong aksyon laban sa droga na nagpoon sa laog kan saindang organisasyon. Alagad posibleng igwa pang masunod na lakdang na dai na ngona pigbuyagyag.
Si Brig. Gen. Westrumundo Obinque, regional director kan Bicol PNP nagpahayag man nin pasasalamat sa Camarines Sur PPO kasunod kan pagpoon na sa liderato ni Domingo kan drug test sa COPs.
Alagad an pamayo kan PNP nagpatanid man giraray na dai magtiwala asin dapat maging doble an PNP sa Camarines Sur sa kampanya laban sa ilegal na droga.
An Camarines Sur asin Ciudad nin Naga saro sa binabagsakan kan ilegal na droga sa Bicol mala ngani dakul an mga apprehension report digdi an Philippine Drug Enforcement Agency asin PNP sa suporta kan comunidad.
Pinaabotan man nin pag-omaw kan RD an Naga City Police Office huli kan mga sunod-sunod na nagkakadarakop na dakulang cantidad nin ilegal na droga.
An regional director enot nang nagpahayag sa media interview an saro sa plano niya na i-adaptar an ginibo kan saindang dating PNP Chief Rodolfo Azurin sa pagsugo sa ‘‘courtesy resignation’’ sa 3rd level officer kan PNP.
Alagad an ginibo sa Camarines Sur iyo na ngona an suprisang drug test na masunod man an ibang mga PPO sa Bicol.