4K e-vehicles sa Naga apektado kan pagbawal sa national road…

Cuatro mil (4,000) na mga electric bicycles (e-bikes) asin electric tricycles (e-trikes) sa Ciudad nin Naga na nag-aagi sa mga national road an apektado kan directiva kan Land Transportation Office (LTO) oras na iimplementar na an pagbawal poon sa Enero 2, 2026.

Si mga masinutil kan orden dadakopon sagcod dagos nang mai-impound sa LTO.

An E-bikes asin E-trikes Association sa ciudad sa pamamayo ni Trinity Mayor nagsabi na andam sindang magsunod oras na estricto nang iimplementar mantang haloy naman nindang aram na ibabawal sa national road.

Alagad kabale sa mga apektado iyo si mga magurang na naggagamit kan saindang e-bikes, e trikes nganing maghatud asin sundo kan saindang estudiantes aroaldaw.

An LTO central office sa paagi ni Assistant Secretary Markus Lacanilao nagsabi na pwede sanang gamiton sa mga barangay roads maging sa laog kan subdivisions, alagad dai kabale sa national road.

Epektivo an kasugoan kan ahencia sa sunod na taon bako lang sa Naga an apektado envez haros sa gabos na municipalidades asin mga ciudades.

An mga reclamo kan ibang mga operator na nagkakayod an sinambit na mga vehiculos dai rehistrado sa LTO asin dai nagbabayad nin buwis na apektado man an saindang pagkayod aroaldaw asin maluya pa an dalagan sa tinampo.

An e-vehicles madaling bakalon huli ta barato asin alternativong motor vehicles.

Sa tahaw kan patanid na iimplementar na kan LTO, an Bicol Saro Party-list sa paagi ni Representante Terry Ridon nagpatanid na mayong base legal an pag-impound kan mga nadadakop kan ahencia mantang an mga light electric vehicles dai dapat basulon huli ta an mga nag-gagaramit kaini mga pobreng familia na praktikal sa sainda alagad dai man sinda tinutugotan na magrehistro sa LTO.

Kun dati nag-aako na an ahencia na dapat marehistro alagad sa ngunian binawi na.