4th, 5th class municipalities tikapo sa pambakal bakuna

Tikapo sa fondo an mga 4th hasta 5th class municipalities nganing magbakal nin coronavirus disease vaccines kun pigmamando kan gobierno nasyonal na setenta (70) por ciento kan Local Development Fund kan LGUs iyo an gagamiton nganing ibakal nin suplay kan bakuna.


Dakul pang mga LGUs sa Camarines Sur an mga nasa 4th hasta 5th class an saindang classification alagad an solusyon digdi magtabang an Capitolio Provincial sa mga sadit an income na LGUs.


An saradit na LGUs mayong naheheling na programa an Capitolio Provincial nganing tabangan sinda sa suplay nin bakuna dawa na ngani matabang an gobierno nasyonal sa kakulangan nin vaccines.


Si Alcalde Ronaldo ‘‘Boy’’ Franco kan Pamplona, Camarines Sur nagpahayag sa entrevista kan Bicol Mail na sinda kabale sa mga municipalidad na 4th class an classification o mayong kakayahan nganing makabakal nin vaccines hale sa Local Development Fund.


Saiyang sinabi sa veinte (20) por ciento kan saindang LDF nagcacantidad sana nin Php26 milyon hali sa Php141 milyon na annual budget kan 2021.


Kun gagamiton an 70 por ciento kan LDF mauubos an saindang fondo na naka-programa ngunian na taon, sabi pa ni Franco.


Sa saindang annual budget dai nagtagama nin alokasyon sa bakuna laban sa Covid-19 envez naglalaom sana sa suplay kan gobierno nasyonal.


Nag-aapelo an jefe ejecutivo kan Pamplona, CSur sa Capitolio Provincial na tabangan sindang mga nasa 4th asin 5th class municipalities maging ngani an ibang 3rd class municipalities posibleng kaparejo man ninda an problema.


Sa San Jose, Camarines Sur sinabi ni Consejal Audie Concina an saindang LGU saro sanang 5th class municipality asin mayong kakayahan na magbakal nin suplay kan bakuna.


Nagkaperang LGUs na 5th class na mas tios pa sa LGU Pamplona iyo an San Jose, Milaor, Gainza, Bombon, Cabusao asin iba pa.


Dai palang nahahaloy si Presidente Rodrigo Duterte nag-awtorisar na sa mga lokal na gobierno na puede nang mag-advance payments sa pagbakal nin Covid-19 vaccines.


Sa Memorandum Order dapat dai magsobra sa quince por cientong advance payments an dapat sunodon kan LGUs sa total na cantidad na saindang babakalon. (DPAureus)