5 candidato naghabol sa substitution/withdrawal

Limang mga candidato sa Camarines Sur an naghabol kan ultimo dia sa substitution/withdrawal sa pagsangat nin certifico de candidatura sa Commission on Election (Comelec) kan Noviembre 15 alagad an sarong nagribay na candidato posibleng cuestionon an saiyang residency.


Sinda dating 1st district Congressman Rolando Andaya Jr. nagsibog kan saiyang COC komo candidatong congresista kan kaparejong distrito asin niribayan siya kan tugang na si Maribel Andaya Eusebio na dagos nang nagsangat kan saiyang COC si Andaya sa cargong gobernador alagad nagdemiter siya bilang provincial chairman kan National People’s Coalition (NPC) asin nagribay saiya bilang pamayo kan NPC iyo si 4th District Congressman Arnie Fuentebella.


Si Eusebio nagkumfirmar sana kan Election Registration Board (ERB) bilang botante kan Ragay, Camarines Sur matapos kan pinaluwas na desisyon kan Noviembre 15 aga.


Niribayan ni Andaya si dating Vocal Russel Bañez na nagsibog na kan saiyang COC sa cargong gobernador.


Sa cuarto distrito kan CSur nagsibog kan saiyang COC si Anjo Yllana komo candidatong congresista asin niribayan siya ni dating alcalde Antonio Chavez kan PDP-Laban.


Naenot kaini kan Noviembre 13 si Noel De Luna candidatong party list kan Kusog Bicolandia nagsangat man kan saindang COC komo candidato nang congresista sa tercer distrito kan Camarines Sur asin niribayan niya si Dennis Tria.


An kampo kan Villafuerte nagpahayag na nakatalaan nindang cuestionon sa Comelec an candidatura ni Eusebio komo candidatong congressman sa premir distrito.


An isyu sa ‘‘one year residency’’ iyo an cuestion contra ki Eusebio mantang naghabol sana sa voters registration sa Comelec Ragay kan huring semana kan Oktubre 2021, alagad an kampo ni Andaya nagpahayag na andam sabaton an ano man isasangat na ‘‘disqualification’’


Si Eusebio dati nang nagdalagan sa cargong congressman sa 2nd congressional district kalaban si Congressman LRay Villafuerte.


Siya nagrehistro sa Comelec Libmanan sa ginibong eleksyon kan 2019 alagad pigprotesta an saiyang ‘‘residency’’ sagcod na nagdesisyon an Comelec na discalificado magcandidato. (dpa)