50% kan mga illegal crossing sa PNR Bicol, sinarahan na

Sobra na sa 50 por ciento kan mga illegal crossing sa Camarines Sur asin Albay sinarahan na kan manijamiento kan Philippine National Railways sa Bicol.

Ini an kinumfirmar sa Bicol Mail kan Engineering Department kan perrokaril poon na magpaluwas sinda nin patanid sa publico kan Hunyo 2024.

Sa labing cuarentang illegal crossing sa Bicol sobra na sa viente an sarado na ngunian asin magpapadagos pa alagad antes sinda na aksyon nacoordinar ngona sa barangay asin sa lokal na gobierno.

Sa paliwanag kan PNR an illegal crossing si mga binugtak kan barangay o LGU na balyohan nganing makaagi an mga vehiculo alagad mayong permiso sa manijamiento kan perrokaril. Ini saro sa mga causa kan aksidente na perming binabasol sinda.

Magigirumduman si Atty. Celeste Lauta, general manager kan PNR nag-atubang sa mga dialogue sa envueltong barangay officials asin media sa causa kan aksidente asin kan mga binugtak na illegal crossing na dapat sarahan.

Nagkapera nang mga aksidente an nangyari huli ta an ibang tsuper nin vehiculo naderetso kan saindang pagbalyo sa relis apesar na iguang nagdadalagan na train.

Huli kaini saro sa saindang pig-aksyonan iyo an pagsara sa mga illegal crossing poon sa Albay asin Camarines Sur.

An aksyon na ini kan manijamiento nganing maseguro an ‘‘public safety’’ para man sana sa mga namamanuan alagad an ibang nasa barangay nag-rereclamo huli ta mayo nang agihan nin vehiculo an saindang lugar.

Sa ngunian an regular na ruta kan Bicol Express haling Naga sundo sa Sipocot asin pabalik sa Naga asin an Naga-Legazpi.

Binagatan nin barandilya kan PNR an ginibong illegal crossing sa balyohan na relis kan mga nag-aaging vehiculo sa Brgy Potot-Inalahan, Libmanan, Camarines Sur. (BM)