51% SA CBSUA: Budget cuts sa SUC’s, dapat ibalik - Bordado

‘‘Ibalik an budget cuts sa state universities and colleges (SUCs), University of the Philippines (UP), particularmente sa Philippine General Hospital (PGH),’’ ini an kahurotan sa pag iriba sa 19th Congress ni Representante Gabby H. Bordado Jr. kan tercer distrito kan Camarines Sur sa ginibong 2023 national budget deliberations sa SUCs.

Si Bordado, assistant minority leader nagpahayag kaini kan makaulay kan Bicol Mail asin an mamundo digdi kabali sa top 10 asin ika-apat sa may dakulang budget cut iyo an Central Bicol State University of Agriculture (CBSUA) –‘’ 51.23 % decrease’’ sa Pili, Camarines Sur na may mga school campuses sa Calabanga asin Sipocot, Camarines Sur.


An iba pang mga SUC’s na may dakulang budget cuts sa propuestong 2023 national budget iyo an minasunod, Marikina Polytechnic College, 80.92% decrease; Marinduque State College, 79.97% decrease; Romblon State University, 63.47%; Mindanao State University, 23.27%; Bulacan Agriculture State College, 22.09% decrease; Batangas State University, 21.80% decrease; Don Mariano Marcos Memorial State University, 17.99%; Basilan State College, 17.03% decrease; asin University of Southern Mindanao, 14.09%.


‘‘I am categorically and strongly calling for the restoration of the budget cuts of SUCs and the University of the Philippines particularly the PGH, Madam Speaker,’’ sabi kan assistant minority leader asin lehislador kan Camarines Sur.


Piglalaban ni Bordado na ibalik an dakulang ginunting na fondo sa tahaw kan saiyang panindugan na an futuro sa edukasyon makakatabang sa pag-asenso kan jovenes asin nasyon.


Si Kabataan Party list Rep Raoul Manuel suportado an pangapodan ni Bordado mantang an edukasyon importanteng marhay para sa futuro kan jovenes asin nasyon.

Main campus kan Central Bicol State University of Agriculture sa Pili, Camarines Sur. (CBSUA FB)


An kahagadan kan lehislador kan tercer distrito kan CamSur na ibalik an budget cuts sa SUCs, UP and PGH pigsusuportaran man kan budget sponsor Cebu Rep. Peter John Calderon.


Mandato sa 1987 constitution na dapat an sektor nin edukasyon maninigo na tagamahan nin dakulang budget, dawa na sa propuestong 2023 national budget kan Department of Education saro sa may halangkaw na prosupuesto alagad an budget para sa tertiary education pigtipidan kan gobierno base sa propuestong 2023 national budget.


Mientras tanto, an presenting board of trustees kan CBSUA Camarines Sur mayo pang komento sa sinambit na isyu huli ta posibleng magbago pa nin panindugan an congreso nganing ikonsiderar giraray an orihinal na budget. (DPAureus)