59 nang mga water meters kan MNWD, hinarabon

Nagsakat na sa 59 mga water meters kan Metropolitan Naga Water District (MNWD) an hinarabon bako lang sa Ciudad nin Naga envez sa sakop na mga banwaan kan Magarao, Canaman asin Camaligan.

Kinumfirmar ni Choppy Dela Cruz sa Bicol Mail, opisyal na parapahayag kan MNWD an sinambit na mga hinabon na metro poon kan Enero 2026 hasta Septiembre 2026. An gabos na ini naka-blotter sa Naga City Police Office (NCPO) na iyo an nag-iimbestigar kan caso.

Alagad saro pa sana an nadadakop kan awtoridad asin kinasohan na sa jusgado mantang sa desisyon ‘‘convicted’’ an acusado.

Mamundo sa mga hinahabonan nin water metro huli ta kaipuhan sindang magbakal nin bago o karibay kan metro na nagcacantidad nin P2,400 na babayadan sa paagi nin ‘‘monthly billing’’ na utay-utay sa laog nin sarong taon, sabi pa ni Cruz.

Sinabi kan MNWD na si mawot magpasegurong consumedores nganing dai mahabon pagibohan nin ‘‘meter box’’ na libre na an bayad sa trabador envez babayadan sana nin P900 si ginamit na materyales kan water district.

Mientras tanto, padagos an pangapudan kan manihamiento na magtipid sa consumo nin tubig huli ta nagbababa na an saindang mga suplay nin tubig sa mga pumping station asin burabod nin tubig hale sa Mt. Isarog.

Apektado an suplay nin tubig huli sa super El Niño na aaboton pa sa premirong cuarto sa 2027.

Sa ngunian dai pang gayo apektado an tubig sa consumedores alagad an epekto sa pagkusog kan super El Niño. An Kabikolan kabale sa apektado kan El Niño base sa bareta kan PAGASA.