6,102 nabakunahan sa Iriga Vax Express

Naging makaskas si bakunahan sa tolong vaccination sites sa Ciudad nin Iriga kan Agosto 6 asin 7 alagad kan maubos si cinco mil na janssen vaccines dakul na senior citizens na kabale sa priority group an nagpipili nin brand kan vaccines.

Igwa total na 6,102 an nabakunahan na dai pa ngani nahapon kan Sabado, Agosto 7 naubos tolos an janssen vaccines.

An IrigaVax Express na padreno kan Office of the Vice President asin an lokal na gobierno kan Ciudad nin Iriga.

Si Bise Presidente Leni Robredo nakareparo kan pagiging ‘‘vax choosy’’ kan ibang mga nagpapatudok nin bakuna matapos maaraman naubos na si janssen vaccines asin igwa nang bagong Sinovac vaccines.

An isyu sa ‘‘vax choosy’’ nangyari naman sa ginibong duwang aldaw na NagaVax Express na pigpadrenohan kan OVP asin kan City Hall.

An mga vaccination sites ginibo sa mga barangay kan San Isidro asin itaas na barangay kan Sagrada na inabot nin banggui digdi si VP Robredo.

Sa mensaje ni Robredo naghanga siya sa mga ginibong preparasyon ni Alcalde Madel Alfelor asin iba pang opisyales lokal, opisyales de barangay asin Department Head kan LGU sa vaccination sites nganing makaskas an vaccination express.

Pinasalamat kan Bise Presidente an 543 na mga medical workers, civic organizations, PNP, DOH Camarines Sur, Philippine Navy Reservist asin dakul pang mga civil society.

Nagpahayag man nin mensaje sa VP si Alfelor asin arog kaini an saiyang mga pahayag sa tagalog ‘‘Maraming Salamat po VP Leni sa inyong pagmamahalal sa amin sa Iriga City. Malaking tulong po ito sa aming lahat at makakasiguro ka po na buo ang suporta ng lahat ng Iriguenos sa lahat ng inyong mga tatahakin at proyekto.’’

Sa masunod na semana an vaccine express kan OVP pigtalaan sa Ciudad nin Quezon. (dpa)