75 positivo sa Covid-19 sa mga pig-swabbed kan SCT

Igwa nang 75 mga positivo sa coronavirus disease sa 565 residentes sa mga barangay kan Ciudad nin Naga na pig-swabbed kan grupo kan Swab Cab Team (SCT) kan Office of the Vice President (OVP) na pigtutuyo na sa mga residencia na igwang naka-home quarantine asin si mga nasa quarantine facilities kan City Hall.

Si Raffy Magno namamayo kan SCT nagpahayag sa Bicol Mail na madali nang matapos an saindang pagtuyo sa mga barangay asin quarantine facility na sinda mismo an naka-obserbar kan nakaaging semana sa saindang paglibot veinte por ciento an mga nagpopositivo asin may sintomas.

Sa saindang pinaluwas na datus kan Lunes, Hulyo 12 nagsakat sa 13.27 por ciento an positivity rate.

An lokal na gobierno kan ciudad na katuwang kan proyekto ni Bise Presidente Leni Robredo iyo an nagdadara kan mga pasyente sa mga nagpopositivo sa isolation center kan LGU alagad depende kun puede sa home quarantine nalang kun igwa sindang sadiring cuarto asin comfort room.

Dinara sa Naga an proyekto huli ta halangkaw an caso sa Covid-19 mala ngani sarong bulan pigpasa-irarum sa modified enhanced community quarantine.

Sinabi pa ni Magno an listahan kan mga dapat ipa-swab hale sa Contract Tracing Center kan ciudad nganing aram ninda an liliboton na barangay asin facilidad sa cuarantina.

An SCT igwang darang tres mil na test kit para sa Ciudad nin Naga, mantang andam sinda magluwas sa iba pang mga municipalidades sa Camarines Sur na kaipuhan sanang maki-partners sa sainda an LGUs.

Dakulang bagay na igwang koordinasyon sa Office of the Vice President asin District Office ni Congresista Gabby Bordado na yaon man sana sa Naga nganing madali mabisita an mga nasa home quarantine asin quarantine facility kan LGU, sabi pa ni Magno.

Si Congresista Bordado nagpahayag an Swab Cab pigpunan sa NCRPLus Bubble kan opisina ni VP Robredo sa paagi kan Bayanihan e-Ataman kan bulan nin Abril asin nagdara sa Ciudad nin Naga kan Hulyo uno ngunian na taon. (dpa)