8,000 pasajeros aroaldaw nagbababa sa bus station

Poon ngunian na semana santa maabot na sa 8,000 na pasajeros aroaldaw an nagbababa sa Bicol Central Station (BCS) sa Ciudad nin Naga hali sa Metro Manila asin iba pang provincia sa tahaw kan harahalawig na bakasyon.

Nagdugang na nin buses an ibang mga kompaniya mientras na kinukulang nang sasakyan pasiring BCS nganing magpuli ngunian na semana santa asin an kadakli sa mga pasajero nagpa-reserba tolos sa pagbuelta sa Manila.

An manijamiento kan BCS sa pamamayo ni Terminal Manager Roderick ‘‘Nonoy’’ Reforsado nagcoordinar na sa Naga City Police Office (NCPO) asin Public Safety Office (PSO) para sa seguridad kan ribo-ribong pasajeros na naglalaog sa bus terminal.

Bako lang an augmentation force kan Naga City Police Office asin Public Safety Office alagad nagkabit pa nin dugang na unit kan CCTV camera sa mga estratihikong lugar.

An dugang na awtoridad nganing mayong magpasaway na ‘snatcher’ asin iba pang may maraot na plano sa laog kan mahiwas na bus station.

Nagpahayag pa si Reforsado na afuera kan dugang na awtoridad katuwang pa ninda an personajes kan Land Tranportation Franchising and Regulatory Board (LTFRB) asin Land Transportation Office (LTO) na iyo man an ma-monitor asin nag-iinspeksyon sa seguridad kan dalagan kan bus sa mga highway asin areglado an mga gulong asin engine.

Kabali pa sa trabajo kan LTFRB iyo an pag-inspeksyon kan franquicia alagad sinda pa an na isyu kan special permit.

Sinabi pa kan BCS an paghibog kan pasajeros ngunian matapos kan duwang taon na paralisado an mga viaje huli kan nakaaging duwang taon na pandemya.

Piglinaw kan manijamiento ano man na over charging sa flete kan ibang bus company na magiging opurtunista ngunian na panahon nin semana santa yaon sa trabajo kan LTFRB. (dpa)