80% kan jeepney sa Cam Sur naka-consolidate na

Kun maging estricto na an Land Transportation Franchising and Regulatory Board (LTFRB) sa mga jeepney na dai nag-consolidate sa huring aldaw kan Deciembre 2023, digdi sa Camarines Sur dai mapaparalisar an transporte mantang 80 por ciento kaini naka-consolidate.

Sa bilog na Kabikolan, sinabi ni LTFRB Directtor Joel Delfeo igwa sanang 70 por ciento mas halangkaw nin diez por ciento an Camarines Sur.

An LTFRB nagtaong plaso sa mga jeepney operator hasta kan Deciembre 31, 2023 nganing mag-consolidate o magbilog nin grupo para magrehistro sa Cooperative Development Authority (CDA) alagad an iba naghabol pa sa huring semana an problema iyo an kakulangan kan mga rekisitos.

Sa mga pahayag kan sarong lider nin transporte na nagsayuma nang magpaluwas kan saiyang pangaran sa Bicol Mail nagtutubod sinda na kun magigin estricto na an LTFRB sa mayong franquicia huli ta dai nagpa-consolidate daing gayo apektado an ribo-ribong pasajeros.

Jeepney saro sa perming piglulunadan nin pasajeros aroaldaw. (ERA)

Ngunian na semana dakul pang PUV an nagkayod huli ta dai pa nagiging estricto an ahencia mientras na nagtao pang dugang na 30 diyas nganing maghabol sa consolidation.

Natuyawan man kan apektadong jeepney operators an gobierno huli ta mandatory an pigmamando kan LTFRB sa modernization program mantang dai kakayahon kan mga tios na operator an presyo kan modernized jeep nin labi sa on milyon pesos. An mangyayari mapundo nalang kan saindang pagkayod asin mawawaran hanap buhay an saindang familia.

An jeepney saro sa nangengenotan na pampublicong transportasyon sa Bicol maging sa bilog na nasyon huli ta puedeng lunadan nin niyog, kopra, paroy, mais, abaca, pinya, mga gulay, frutas asin iba pang mga produkto agricultural.

Epekto kan jeepney modernization kun dai na tugotan directso nang phaseout.