94% kan mga tinatamaan HIV kalalakihan, sabi

Ngunian na bulan nin Deciembre iyo an AID’S Awareness month huli kaini nag-aalarma na an Department of Health (DOH) sa publico huli kan padagos na paglangkaw kan HIV/AIDS cases sa Bicol mala ngani igwa nang total na 2,400 cumulative cases poon kan 1984 hasta ngunian na taon.

Alagad sa pinaluwas na datus kan DOH kadakli kan tinatamaan mga kalalakihan na nag-aabot na sa 94.08 por ciento o 2,258 mantang 5.92 por ciento kababaehan o igwa sanang 142 alagad poon kan Enero hasta Hunyo ngunian na taon igwang total na 246 cases sa rehiyon.

Si Director Dr. Ernie Vera sa paagi ni Dr. Malta Bobis, Family Health Cluster Head, nagpahayag na kaipuhan nang mag-envuelto digdi an comunidad nganing labanan an paglangkaw kan virus sa paagi nin mga prevention, treatment asin suportaran an PLHIVs.

An DOH nagsabi sa paagi kan healthy habit sa paagi kan ‘‘practice safe sex’’ dakulang bagay magin an mga advocacia na dapat gibohon kan mga opisyales de barangay.

Nagpagirumdum an ahencia na igwa sindang libreng confidential HIV testing sa mga Rural Health Units kan mga LGUs, yaon an Bicol Medical Center asin iba pang hospital kan gobierno sa rehiyon asin mga City asin Municipal Health Unit.