95% pabor sa modular learning-sabi kan DepEd
Inaabot na nin 95 por ciento kan mga enrollees na estudiantes sa escuelas publika sa Ciudad nin Naga sagcod kan Septiembre 13 an nagpabor sa modular learning envez sa online classes huli ta bugbog na sinda sa maghapon na paggamit nin laptop.
Ini an experiencia kan mga estudiantes sa nagtapos na school year 2020-2021 asin sa ginibong survey kan City School Division of School kan Ciudad nin Naga base sa resulta sa pag-file up kan estudiantes sa learning survey form.
Sa entrevista kan Bicol Mail ki City School Supt. Manny de Guzman, sinabi kaini na iyan base sa ginibong learning survey kan panahon na nagpapa-enroll sinda ngunian na school year 2021-2022.
‘‘Bugbog sa maghapon na pag-atubang sa computer ngani sanang makapag-adal sa online classes’’.
An survey kan DepEd Naga ginibo nganing madeterminaran an pag-adal kan estudiantes sa modular learning asin sa online classes mantang suspendido pa an face-to-face classes sa tahaw kan nagpaparalangkaw na caso kan Covid-19.
Afuera pa kaini, pinag-simplify ninda an modular nganing dai madipilisan an estudiantes asin ini an ginibong pagbabago sa blended learning, sabi pa ni de Guzman.
Sagcod kan Septiembre 13 nag-abot na sa 87 por ciento an enrollees sa Ciudad nin Naga asin piglalaoman na madugang pa an numero mientras pinalawig pa an enrollment hasta sa Septiembre 30, 2021.
Oya an breakdown kan nagpalistang mga estudiantes sundo kan Septiembre 13: Sa elementarya kan nakaaging school year 2020-21 igwa nang 21,745 (83%) kumpara kan nagtalikod na school yr. 26,292; sa segundarya – igwa nang 14,903 (86%) hale sa dating 17,247 asin sa Sr. High School – igwa nang 5,884 (106%) hali sa dating 5,541.
Sa pribadong escuelahan, igwa pa sanang 8,065 o nasa 41 por ciento pa sana hale sa dating 19,820 alagad piglinaw kan DepEd an bilang na ini dai pa nakukumpleto mientras pighahalat pa an numero kan enrollees hale sa iba pang mga escuelahan.
Nagtutubod an DepEd Naga na maabot man giraray an 100 percent na enrollees sa pribado asin pampublikong escuelahan sagcod sa Septiembre 30.
Sa premirong aldaw kan burokasan klase si Supt. de Guzman naglibot sa manlaen-laen na escuelahan nganing aramon an kamugtakan dawa na ngani igwa nang ginibong mga preparasyon an mga paratukdo.
Saiyang sinabi pa na mayo naman sindang naheling na problema mientras na si ginibong pormal na burokasan klase pinaagi sa virtual huli kan isyu sa social distancing. (DPA)