95% target kan DOH sa Ligtas-Tigdas 2026

Nagpoon na ngunian na Agosto 2026 an Ligtas Tigdas digdi sa Bicol kan Department of Health na target an 95 porciento kan mga kaakian na nag-eedad nin 6 hasta 59 bulan an dapat mabakunahan.

Si Assistant Regional Director Dr. Joel Buenaventura kan DOH Bicol nagsabi na importante sa mga kaakian macompleto nin bakuna para sa proteksyon sa saindang salud.

Bukas an mga Health Center o arin man na lugar na vaccination center kan LGUs nganing digdi darahon kan mga magurang an saindang papabakunahan na aki.

An DOH Bicol nagpaluwas nang directiva sa mga Health Officers kan LGUs nganing ma-target an 95 porciento kan mga kaakian sa Bicol mabakunahan.

Alagad padagos an advocacia kan ahencia nganing an mga magurang tabangan an saindang kaakian na madara sa health center o vaccination center.

Hagad pa kan DOH sa mga opisyales lokal na suportaran an saindang Ligtas Tigdas program nganing halangkaw an numero kan mga kaakian na mabakunahan.

Maging an kooperasyon kan mga magurang hagad kan DOH mantang an programang ini para man sana sa proteksyon sa salud kan saindang mga aki.

DOH Bicol naglansar na kan pormal na pagpoon kan Ligtas Tigdas Campaign sa rehiyon para sa proteksyon sa salud sa mga kaakian.