97% kan mga paratukdosa DepEd bakunado na

Nagrarani na an burokasan nin klase sa Agosto 22, 2022 an Department of Education (DepEd) sa Bicol nagpahayag na nasa 97 por ciento kan saindang mga paratukdo asin empleados bakunado na.

An halangkaw na numero kan mga nabakunahan kasunod kan saindang pag-andam sa burokasan nin klase para sa school year 2022-2023.

Si DepEd regional director Gilbert Sadsad nagpahayag an saindang mga paratukdo andam naman sa limited face-to-face classes alagad piglalaoman ninda na an mga magurang dapat magkooperar nganing madara an saindang mga aki sa vaccination venue nganing matudokan na nin vaccine laban sa coronavirus disease.

An mga lokal na gobierno asin an Department of Health nagpapadagos kan saindang mga ginigibohan bakunahan sa mga estudiante sa elementarya asin high school nganing sa burokasan nin klase mayo nang problema.

Alagad kun dai pa bakunado an ibang estudiantes puedeng maglaog sa klase mantang dai man sinda binabawalan base sa direktiba kan saindang opisina sentral.

Mantang kulang na nin sarong bulan antes kan pagsikad kan klase an mga opisyales kan DepEd padagos kan saindang preparasyon nganing maimplementar an health and safety protocol.

Sainda man giraray ipapasunod an social distancing susog sa mandato kan national IATF.

An mga paratukdo nagpoon nang magpasunod sa physical distancing sa enot na rangkada kan limited face-to-face classes.

An sunod na saindang aandaman iyo an full face-to-face classes sa Noviembre 2022 na saindang iimplementar base sa direktiba kan gobierno nasyonal. (dpa)