9th ID, PNP sarong fuersa sa eleksyon

An 9th Infantry Division kan Philippine Army sa Bicol na may base sa Camp Elias Angeles, San Jose, Pili, Camarines Sur dawa nakatutok an saindang kampanya laban sa insurhencia alagad preparado na magtabang sa Philippine National Police sa panahon nin eleksyon.

Ini an asegurasyon ni Major General Alex DC Luna, Commanding General kan 9th ID sa pagsikad kan election period kan Enero 9 na matatapos sa Hunyo 9, 2022.

Sinabi kan CG kan 9th ID andam sindang magpadara nin augmentation force sa PNP kun kinakaipuhan sa panahon kan campaign period sa mga candidato lokal asin nasyonal.

Alagad preparado man giraray an saindang tropa sa ano man na operasyon kan rebeldeng New People’s Army.

Si Provincial Director P/Col. Bernardo Perez, kan PNP Camarines Sur nagpahayag an saindang area of responsibility iyo an 35 municipalidades asin sarong ciudad nin Iriga, dai kaayon an Ciudad nin Naga alagad igwa sana sindang 1,776 na kapupulisan na mamantenir kan paz y orden sa panahon kan eleksyon.

An tropa kan PNP asin Philippine Army nagtatarabangan sa Comelec checkpoint na binugtak puon kan Enero 9 sa pagsikad kan election period.

Sinda Luna asin Perez parejong nagpahayag sa miembros kan media na an saindang mga naka-duty pulis asin militar kumpleto nin oniporme na dapat tataong magrespeto kan ‘‘constitutional rights’’ kan lambang indibiduwal na nag-aagi sa Comelec checkpoint.

Mientras tanto, si Comelec regional director Rafael Olano, nag-apelo sa mga motorista na kun igwang mga pang-aabuso an police personnel asin militar na nagpapadagan kan Comelec checkpoints isumbong sana sa saindang opisina. (dpa)