9th ID sa Bicol nangapodan sa natatadang NPA, magbalik loob na

Sa tahaw kan lakma na an fuersa kan Communist Party of the Philippines/New People’s Army (CPP/NPA) sa Kabikolan, an 9th Infantry ‘'Spear’’ Division, Philippine Army sa Kabikolan nangapodan sa natatadang rebeldeng grupo na magbalik loob na sa gobierno.

Si Major Frank Roldan, opisyal na parapahayag kan 9th ID nagpahayag na sa ngunian paralisado na an grupo laen kan haros mayo nang suporta an saindang lider nasyonal, dai na nakakakalap nin bagong miembro, mayo nang suporta an comunidad asin sunod-sunod na an mga nagsusuko afuera kan mga naenot na grupo kan mga nakaaging taon.

Si mga nagbalik loob normal na an saindang buhay familia mantang tinabangan kan gobierno asin nabayadan kan mga sinukong armas, kabale na an rehabilitasyon sa paagi kan Enhanced Comprehensive Local Integration Program (E-CLIP), sabi pa ni Roldan.

Natatawan nin futuro an mga nagbalik loob marhay na pagbuhay asin matrangkilong mga familia.

Warak-warak na an natatadang rebeldeng NPA na padagos pa an pakikipaglaban alagad an 9th ID nagsabi na bilang na sinda dawa igwang mga insidente nin encuentro sa Albay, Camarines Sur, Camarines Norte asin Masbate asin sinda an parating dejado sagcod nagagadanan, sabi pa.