LRV

Pakalihis kan tiempo Hapon asin kan makamit na an katalingkasan kan Pilipinas kan 1946, halop sa pusog na liderato an ronang Kabikolan bako lang an mga Camarinenses.

Antes kan giyera mundial kan panahon pa nin Commonwealth sa pangengenot kaidto ni Presidente Manuel L. Quezon, an mga matanog na pangaran kan Bikolano sa lado nin politika iyo sa Madrigal, Ziga, Fuentebella, Imperial, Arejola, Ocampo, Felipe asin nagkakapera pang iba na may mga kaya na, may mga inadalan pa, mahiwas an mga propiedades asin sinda gabos mga poderoso.

Kaidto an kunsideradong centro kan Kabikolan, pig-aapod nganing Puso kan rehiyon iyo an Naga palibhasa centro kan relihiyon asin an Ambus Camarines (Norte asin Sur) dakulaon na marhay an hila-hila haros binglod sana an Albay, Sorsogon asin Masbate.

Kan an Naga saro nang ciudad, charter city pa asin suhay na sa Camarines Sur, an Camarines Norte separado naman, an Catanduanes nagsuhay na sa Albay, an centro kan komersyo sa Bikol Naga man giraray, digdi pa an regional Penafrancia festival na dinadalaw poon ginatos na ribo sagkod milyones na mga perigrinos.

Nagparadakol an mga Bikolanos pero Naga asin Camarines Sur man giraray an pinaka-matao. Pag-abot kan dekada 70, nakabalyo an regional center sa Albay pero dominado man giraray kan Naga asin Camarines Sur an negosyo asin relihiyon sa Bikolandia.

Kan huring parte kan dekada 40 asin enterong parte kan dekada 50, an mga lideres kan Camarines Sur asin kan Naga nomrado pa kan Malacanang.

An duwang mayor na partido kan nasyon, Liberal asin Nacionalista anas pang nagdudurulak kaya an mga Bikolano mayong unidad. An taga-Albay sa Albay sana an interes, an mga Camarinenses pan saderi man lang, lalo na an Sorsogon asin Masbate. Man iba-iba pa an lenguahe asin tataramon ninda.

Kan dekada 70 panahon kan Martial Law, taon 1978 kan magka-igwa nin regional election para sa Interim Batasan Pambansa, nagbutwa na an pangaran ni Press Secretary Francisco “Kit” Tatad kan islang provincia kan Catanduanes asin Louie Villafuerte kan Naga/Cam Sur ta sinda an nakakua kan pinaka-dakul na boto sa anom na provincias asin tolong ciudades kan Naga, Legazpi asin Iriga sa 1978 IBP regional election.

Primero kong nadangog an boses ni Luis Robredo Villafuerte sa opisina kan Bikol River Basin Development Program sa Baras, Canaman pa kaidto. Kaulay niya si director Badong Pejo asin mga deputy directors.

Siisay nyako yan na matibay magtaram na bisita? Sabi kan boss ko kadto na si Doming Alarkon, si Atty. Luis Villafuerte. Bago palang siyang puli sa Bikol bago palang magretiro sa Bancom investment bank como senior vice-president alagad pinapuli na palan sya digdi sa Bikol ni Presidente Marcos nganing mag-andam kan kandidatura bilang assemblyman kan IBP.

Bako lang ako kundi si gabos na halangkaw na opisyales kan Basin kumbensido sa mga platika ni Villafuerte, an mga plano niya para sa Bikol, an mga ideya niya sa ekonomiya asin negosyo bako lang sa Bikol kundi sa enterong Pilipinas.

Napabilib ako sa bagong lalawgon ni Villafuerte na garo bakong tradisyonal na politiko.

Ginibo siya ni Marcos bilang trade minister o ministro sa negosyo sa panahon kan Martial Law. 40 anyos pa lang siya kan mag-retiro sa pribadong sector, TOYM Awardee for investment banking, abogado de kampanilya, graduate sa UP College of Law, national awardee sa UP bilang orador asin debatista, konsideradong technocrat ni Ferdinand asin Imelda Marcos. Nagsusurat pa nin column sa Philippines Daily Express.

Kaya lang kan magadan si Ninoy Aquino apesar na dati siyang Marcos boy, siya na an nangenotan kan laban kontra sa Marcos conjugal dictatorship.

Siya an nangenot kan grupong Apat na Aguila sa lindong kan UNIDO Party na nagronot kan Apat na Uwak (KBL). Kaya kan panahon na idto may rimong-rimong na, na si Villafuerte pwedeng mag-presidente kan Pilipinas sa maabot na panahon. Asin inako niya yan samo mismo na mga announcers sa DWLV kaya inaranggutan kami ako: Cris Rances, si Ric Diaz, Gil Basmayor na dai magpara-irinom nin arak ta kun pirmi kamong bururat kun yaon na ako sa Malacanang.

Sabi mi ngani kun hitsura man lang ang pag-oorulayan mas magayon na lalaki si Villafuerte kesa sa artistang si Erap Estrada.

Ako personalmente nagtutubod na kun si Doy Laurel an naguin presidente kan Piipinas asin dai nagpahunod ki Cory dahil sa sutsot ni Cardinal Sin, si Villafuerte an campaign kan Doy Laurel for President Movement pwede si Villafuerteng makalaog sa Malacanang bilang presidente sangli kuta ki Laurel.

Asin kun si Ramon Mitra nangganang presidente kontra ki FVR ta si Villafuerte man giraray an national campaign manager, pwede kuta nang siya makasuso sa Malacanang bilang hepe ehecutivo.

Kundi pakatapos kan EDSA Revolution kan si Cory na an nakatukaw na Presidente kan magka-igwa nin primerong eleksyon sa senado may sarong slot o pwesto na nakareserba ki Villafuerte pero habo niya na akoon an nominasyon kaya itinao niya an pwesto ki Victor Ziga.

Duman narisa na habo niyang bayaan an Camarines Sur, poon kaidto dai na siya nagka-igwa nin interes sa politika nasyonal apuera sa posisyon na deputado o representante.

Naguin chairman siya kan Bikol Regional Development Council, pigtitingag na siya kan mga lideres nin provincia bilang regional leader o tunay na lider kan mga Bikolano huli kan saiyang abilidad bilang pinaka-halawig na gobernador kan pinakadakulang provincia na iyo an Camarines Sur, briyante an saiyang trabaho bilang lehislador asin nai-andam niya an saiyang pamilya poon sa aki asin sa mga maku-apo na magkarapot nin rienda de gobyerno kan provincia kan Camarines Sur.

Igwa nang “Build, Build, Build” sa Camarines Sur antes ki PRRD.

Siya an nag-imbento kan political broadcasting sa Bikol na pinaghangaan bako lang sa laog kan rehiyon kundi sagkod sa luwas pati duman sa Palawan, sa Quezon province, Marinduque asin Mindoro.

Sa huring parte kan saiyang karera politika siya mismo personalmente naguin broadcaster asin primetime announcer and commentator.

Pambihirang politiko si Villafuerte ta apuera kan magayon na personalidad, brilyanteng kadunungan asin tambak na inadalan grabe pa an saiyang karinyo sa tao, may panahon siya sa lambang saro tanganing maka-ulay, nagbabasa siya nin kadakul na libro asin iba pang mga babasahon kaya hararom na marhay an saiyang pagkanood na saiyang pigwawaras niya sa saiyang mga contituentes.

Mahiwas asin halawig an saiyang vista o paghiling para sa karahayan asin malinaw na futuro kan saiyang mga nasasakupan.

Biglaan an pagpaaram asin pagtalikod sa kinaban ni LRV pero dai nungka malilingawan an saiyang mga naginibohan bilang lider kan Kabikolan.