Bago

Milyones, bilyones o tibaad sobra pa sa trilyones na taon an uminagui na sa kinaban na ini, an pinaka-bago iyo ining taon 2022.

An pighahangay kan kadaklan na bagong taon, kontra sa daan na nagtalikod na mas maogma, mas magaya-gaya, mas matuninong asin mas masagana.

Si gabos na mga malaen na pangyayari kan naka-aguing 100 na taon toyo tang piglilingawan arog kan tiempo Hapon, giyera mundial numero II, Martial Law, kapasawayan kan mga rebelde asin terorista lalo na an pandemya huli sa Covid-19 na nagbiktima nin milyones bako lang sa Pilipinas kundi sa enterong kinaban.

Ngonyan na taon an pig-aapod na simbolo nin paglaom iyo an eleksyon sa maabot na Mayo an pagpili kan bagong presidente kan Pilipinas, an pagpili kan bagong gobernantes sa mga provincias, ciudad asin banwaan, an pagpili nin mga senadores asin deputado na marepresentar sato sa senado asin maboses kan satuyang sientimento.

An maconsuelo pat isa pananaw nin tao mask ikan mga cartoonist kan media dapit sa bagong taon iyo na pagpoon kan Enero, minapoon sa sarong omboy alagad pakalihis nin 12ng bulan pag-Disyembre si Omboy saro nang gurang, halaba an buhok pati an barabas medyo buktot kun maglakaw, gurangon na an hitrusa na garo nagdedeliryo na.

Garo habang dali sana kan sarong taon madaling mamundag, madali man magadan asin niriribanyan tulos kan masunod naman na bagong taon.

Sabi kan mga pilosopo an gurang ibarangbang. Lingawan na ta tapos na an saiyang servicio.

May bago nang mga ugali, may bago nang klase nin pagbuhay.

Naguiguiromdoman ko pati si apat na bagyo kan bulan na Oktubre asin Nobyembre 2020 maski grabe an distroso satuyang lugar maski ngani si harong mi nagkagaraba pero pinipirit tang lingawan nganing atubangon an bagong bukang liwayway.

Positibo an satuyang pananaw. Sabi ngani kan sarong propesora an 2022 sarong simbolo nin paglaom lalo na sa mga Bikolano kun si VP Leni Robredo matawan nin oportunidad na magserbe bilang lider kan nasyon.

Iyo daa ini an panahon kan mga Bikolano na haloy nang pighahalat na mag-asenyo an rehiyon, magkaburunyog an mga Bikolano asin ipahiling sa kinaban na an ronang ini nin mga magagayon asin mga oragon pwedeng magtao nin triumfo sa nasyon Pilipinas na haloy nang pighahanap-hanap poon pa kan panahon nin mga Kastila asin mga Amerikano.

May bago na pating kolor an Kabikolan, inda kun saen man yan hali o siisay an nagtikda kaiyan ki Madam Leni pero gabos na Plaza sa Naga----Plaza Rizal, Plaza 15 Martirez, Plaza Quezon garo mala-rosas na pisngi nin daragitang nakahiling nin crush na biglang namula-mula an pisngi pati dimple.

Lakop iyan na malarosas na kolor bako lang sa Naga pati Cam Sur kundi pati sa anom na provincias asin pitong ciudades kan Bikol.

Garo magabat an kalaban ta si dating senador Bongbong Marcos na dinaog ni Leni nin 250mil sanang boto kan 2016 an pinaka-magabat na kalaban kan Bikolanang aspirante para presidente. An bise ni Leni na si Kiko Pangilinan na agom ni Sharon Cuneta garo maluyang katandem. Mas makusog pa si Tito Sotto na agom ni Helen Gamboa na inaon man sana ni Sharon Cuneta.

Lalo na si Sara Duterte na aki ni Presidente Duterte na makusugon na bise ni BBM. Si senador Marcos an nagsurog ki Cong LRay, depuntong Luis Villafuerte asin incumbent Gov Migz Villafuerte na dai mabanga an Cam Sur.

Dai kita nungka maguin tamyang, dapat an kampanya ta para ki Leni bilang presidente bako lang sa Bikol kundi sa ibang parte kan Pilipinas arog kan Metro Manila, Metro Cebu asin Metro Davao pati duman sa solid North kan mga Marcos.

Ngonyan pa lang magkaburugkus n akita bilang mga Bikolano kontra sa tentasyon nin kwarta lalo na kan pakiki-aram kan ibang nasyones kan politika sa Pilipinas siring kan Estados Unidos de Amerika.

Bago na kaya an satuyng presidente sa Hulyo 1, 2022: Bikolana o Ilokano?