EDSA



Labing tolong dekada na an nakaka-agui, 36 anyos kan mangyari an rebulosyon kan tao kontra sa gobyerno kadto kan 1986.

Ribong pa man an tao kun papanohon, kun mapabor o makontra sa nanunungdan na gobyerno, military, gobyerno civil asin mga pulis na nagmamantinir kan paz y orden.


Palibhasa si Presidente Marcos an consideradong lider nasyonal, an mayoriya kan mga civilian tubod sa gobyerno.


Alagad si mga politiko sa oposisyon kaidto, an ibang mga miyembros kan media, broadcast asin prensa sa tabang kan mga politiko na nag-eerestar sa luwas kan Pilipinas arog kan Amerika asin sa tabang mismo kan mga dayuhan na media, luhay-luhay na nawawaraan nin kompiyansa asin tiwala sa gobyerno nasyonal asin ki Presidente Marcos mismo huli soboot sa pagkawara kan demokrasya.


May mga rebelde pa na mga tugang ta an armado asin nagkusog an pwersa sa kabukidan, kakadlaganan asin nakapahiripli sa mga poblaciónes asin ciudades mismo asin naghahalat na mag-alsa asin ribayan an mga nasa pwesto.


Aktwalmente dakulang bagay an naguin epekto kan pakagadan ni Senador Ninoy Aquino. Sa paghuna an biktima pinagadan kan gobyerno mismo maski ngani sagkod ngonyan dai pa lamang ini na proprorbaran asin mayo ni sarong korte an nagdecidir o nagtukdo kun siisay man nanggad an nasa likod kan pagbadil, gadan ki Ninoy sa Manila International Airport.


An mga Pilipino naghahalat talaga nin bagong lalawgon sa Malacaṅang na mapadalagan kan gobyerno nasyonal. Palibhasa may mga huring-huding asin nagruruluwas diit-diit sa media kan oposisyon idtong pig-aapod na mosquito press na may mga eskandalo asin korapsyon asin pag-aabuso sa laog kan burokrasya sagkod sa mga lokal na gobyerno luhay-luhay na an mga tao nawawaran nin pagtubod sa gobyerno mismo.


Palibhasa nagtutubod kan siguradong kapangganahan si Marcos, nagpa-apod nin snap election. Kuta na an masabat ki Marcos si dating Senador Salvador “Doy” Laurel bilang kandidato kan oposisyon asin kan partidong UNIDO.


Ang poderoso asin popular na Arsobispo kan Manila na si Jaime Cardinal Sin na iyo an nagkombinsir ki Laurel na magpahonod na lang bilang Vice-Presidente apabor kan saiyang manok na si Corazon Cojuanco Aquino, an biyuda ni Ninoy.


Maski andam na kuta na si Laurel kan saiyang fundo para sa kandidatura pati materyales sa kampanya arog kan mga streamers asin mga pampaskil pero nagtubod siya sa lider kan Simbahan Katoliko.


Sa eleksyon kan bulan na idto nin Pebrero 1986 fuerte an laban asin dakula an pag-asa kan oposisyon na may huring-huding pati na si Marcos may malain nang helang asin magagadanon na.


Sa totoo lang iyo ngani ito an dahilan kun tano ta nagpuli si Ninoy hali sa Amerika sa pagtubod na si Marcos magagadanon na asin babayaan na an pwesto bilang lider kan nasyon.


Kan magpoon na an karampanyahan, an ambos lados nagka-igwa nin pag-asa na magana, an administrasyon asin an oposisyon, makusog an pagtubod na an administrasyon ta yaon sa pwesto suportado pa kan militar magana asin tibaad magdaya pa, sa ibong na lado an oposisyon nagtutubod na an mayoriya kan Pilipino gusto na talagang maghawas sa pig-aapod na kadikloman kan Martial Law.


Paka-election an Comelec nagdeklara na gana si Marcos alagad an oposisyon nagdeklara man na gana si Cory sagkod sa punto na si mga volunteer na parabilang nagwalk-out ta may daya daa. Duman na nagka-igwa kan pig-aapod na People Power asin an mga tao sa pangapudan ni Cardinal Sin nagtiripon sa kalabaan kan EDSA bilang pagprotesta. Tanganing suportaran si Cardinal Sin pati mga padi, seminarista, mga madre asin mga laykong lideres kan simbahan Katoliko nagsururog asin nagduruman man sa EDSA.


Sa paghuna na tibaad ipabomba ni Marcos sa saiyang mga soldados an rinibong katauhan kan biglang magbutwa sa EDSA an defense minister ni Marcos na si Juan Ponce Enrile asin si Heneral Fidel Ramos na iyo an pamayo kan fuersa militar, nagpahayag kan saindang suporta sa People Power laban sa saindang among na si Presidente Marcos.


Huli kaidto naideklara si Cory bilang ganador sa eleksyon asin nailuklok sa pwesto bilang Presidente kan Pilipinas.


Si Marcos asin an pamilya ilinayog padulag pasiring sa Hawaii, Estados Unidos de Amerika.


Iyan an estorya kan EDSA. Matubod kamo o dai kamo na an bahala. Kontra kamo o pabor sa mga kabig ni Marcos, sa mga kabig ni Cory Aquino kamo na an bahala.


An tunay na estorya mabutwa asin mangingibabaw man guiraray pag-abot kan tamang panahon.