SUWI

By Mercy P. Luntok

Suwi ang ibanan

Kan pasiring asin paduman

Dae magkanag puan

Dawa hararanihan

Arog kaiyan an kinaban

Suwi na tinuran

Habang dakul ang kadunungan

An mga tao mangmang sa simpleng bagay

Pati an mga kapalibutan, suwi siring man

Imbis preskong gugunuon

Mga kakanon papaalangon

Pareho daa an nutrisyon

Suwi man ang mga parabulong.

Sa hawak may ginagadan para An buhay madugtungan

Mala ta si padi, naglaom man

Mayo na baga ngonian. Suwi na naman.

Kadto an pagtubod, nasa pag agom an kaugmahan

Suwi na baga, sa pag suway na daa an katuninungan

An mga aki gusto nang dumakula,

Daradaraga pa sana, ti aagom na

An mga gurang man, an mawot makabalik

Sa pagiging aki na pano nin hagikhik

Suwi dahil may nangangadyi

dugtungan an saiyang buhay

Sa balyo naman, may nagmamawot na sya magadan

An aki asin magurang suwi naman

An magurang na an inaanggutan

Ta an mga aki na an nagpapasunod

Naghuhurma sa magurang

Dawa an mga suwi pirming magka abay,

Siring sa mga naerenot na suwing maray

Ugwa man mga suwi na talagang marayrahay