ACD kan NCPO vs jueteng, STL sa Ciudad nin Naga

An bagong acting City Director kan Naga City Police Office (NCPO) nag-asegurar sa mga Nagueño na dai magdadanay sa saiyang liderato an ilegal na koleksyon sa Small Town Lottery (STL) na ginigibong prontera kan sugal na jueteng.

Si P/Col. Nelson Pacalso, nagpaluwas nang direktiva sa mga chief of police sa anom na Police Station na dapat mayong ilegal na STL sa saindang area of responsibility maging ano paman na klaseng ilegal na sugal.

Perang aldaw palang si Pacalso sa NCPO igwa nang tolong mga coreador an nadakop alagad dai na nasunod.

An acting CD kan mag-atubang sa miembros kan media nag-asegurar na dai magdadanay sa saiyang liderato an ilegal na sugal.

Si Camarines Sur PCSO Provincial Manager Jobet Ramos nagpahayag na nagrereclamo na sa saindang opisina an operator kan Evenchance Gaming Corporation na apektado an koleksyon sa STL huli kan ilegal na sugal na jueteng.

Pighahalimbawa sa ibang provincia na nasara an operasyon kan STL huli ta apektado kan operasyon kan jueteng mantang an nasa likod kan ilegal na actividad igwang politico.

Saiyang kinumfirmar na ano man na koleksyon sa Ciudad nin Naga, ilegal mantang mayong pig-isyung business permit an City Hall.

Igwa man residentes kan ciudad nagsabi na dai madanay an ilegal na sugal kun mayong proteksyon sa opisyal kan gobierno asin awtoridad.

Kan panahon ni dating City Director Col. Marlon Catan langtadan an tarayaan dawa saen na kanto kan mga barangay asin maging sa centro kan ciudad.

An acting CD antes madestino sa NCPO, dating namamayo kan Logistics Support Service Division sa headquarters kan Philippine National Police sa Camp Crame sa Ciudad nin Quezon.

Nagtapos sa Philippine National Police Academy (PNPA) Class of 1998. Siya sarong karatista asin dating Southeast Asian Games gold medalist.

Mientras tanto, nagcierto si Pacalso na ngunian na panahon nin eleksyon saiyang tatawan prioridad an paz y orden asin estrictong implementasyon kan gun ban. (dpa)